ពេជ្រ សូលីកា ប្រកាសលុបចោលកម្មវិធី ១ ខែ ទាំងកត់ក្រហល់ ហាក់មានរឿងអ្វីក្នុងចិត្ត

ជាការពិតណាស់ តារាចម្រៀងស្រី ពេជ្រ សូលីកា គឺជាតារាចម្រៀងស្រីនៅក្នុងប្រទេសកម្ពុជាដែលមានសំនៀងផ្អែមស្រទន់ដ៏ល្បីល្បាញមួយរូបនៅក្នុងស្រទាប់យុវវ័យ។ យ៉ាងណាមិញមួយរយៈចុងក្រោយនេះ តារាស្រីរូបនេះហាក់កំពុងឡើងកូដខ្លាំងគួរឱ្យកត់សម្គាល់ ដោយបទចម្រៀងនីមួយៗសុទ្ធតែចាក់ដោតអារម្មណ៍ និងត្រូវចិត្តប្រិយមិត្តអ្នកស្តាប់ផងដែរ ។

ស្របពេលដែលកំពុងកាក់កប និងកើនឡើងនូវសន្ទុះប្រជាប្រិយភាពនៃការគាំទ្រពីសំណាក់មហាជន រហូតក្តោបបានទីផ្សារយ៉ាងខ្លាំងក្លាក្នុងវិថីសិល្បៈរបស់ខ្លួន ដោយតែងតែបង្ហាញមុខនៅតាមកម្មវិធីតូចធំនានាជាហូរហែ ស្រាប់តែតារាចម្រៀងស្រីពូកែដាក់មនោសញ្ចេតនារូបនេះ បានឱ្យដឹងតាមរយៈសារដែលបានបង្ហោះនៅក្នុង Story Facebook ដ៏គួរឱ្យចាប់អារម្មណ៍យ៉ាងដូច្នេះថា “សុំ Cancel Event ទាំងអស់ ១ ខែសិន សុំលម្ហែខួរក្បាលបន្តិច រូបដែលត្រូវផុសឱ្យ Client នៅផុសធម្មតា”។ ជាមួយគ្នានេះ អ្នកនាងក៏បានឱ្យដឹងបន្តទៀតថា អ្នកនាងត្រូវការសន្តិភាព ។

ដ្បិតថា អ្នកនាងបានបង្ហោះសារដ៏គួរឱ្យចាប់អារម្មណ៍បែបនេះក្តី ដោយឡែកបើក្រឡេកទៅកាលពីថ្ងៃទី ១២ ខែកក្កដា ឆ្នាំ ២០២៥ កន្លងទៅថ្មីៗនេះ ពេជ្រ សូលីកា ក៏ទើបតែបញ្ចេញបទចម្រៀងថ្មីរបស់ខ្លួនដែលមានចំណងជើងថា “ក្រែងថាស្រឡាញ់” ក្តៅៗមិនទាន់បានប៉ុន្មានផង តារាចម្រៀងស្រីរូបនេះក៏បានបង្ហោះសារដូចដែលបានរៀបរាប់ខាងលើ ហាក់កំពុងបង្ហាញឱ្យអ្នកគាំទ្ររបស់ខ្លួនដឹងថា ខ្លួនកំពុងមានរឿងខ្វល់ខ្វាយក្នុងចិត្ត រហូតបានលុបចោលកម្មវិធីទាំងអស់ដល់ទៅ ១ ខែឯណោះ ៕