កំពង់ស្ពឺ៖
យុវជនម្នាក់ ត្រូវបានម្តាយនិងជីដូនដាក់ពាក្យបណ្តឹងឱ្យនគរបាលឃាត់ខ្លួន ខណៈដែលខឹងសុំលុយចំនួន២០ម៉ឺនរៀលទៅទិញថ្នាំញៀនមិនបាន ក៏ទាញពូថៅ វាយបំផ្លិចបំផ្លាញសម្ភារៈចានឆ្នាំង ហើយគំរាមសម្លាប់ជីដូនទៀត ដោយអស់ទ្រាំនិងទង្វើកូន និងចៅធ្វើ សម្រេចចិត្តប្តឹងនគរបាល។
ការឃាត់ខ្លួនយុវជនចិត្តសាហាវធ្វើបាបម្តាយនិងជីដូន នេះ ធ្វើឡើងកាលពីថ្ងៃទី១៤ ខែកក្កដា ឆ្នាំ២០២៥ នៅក្នុងភូមិរោងម៉ាស៊ីន ឃុំតាសាល ស្រុកឱរ៉ាល់ ខេត្តកំពង់ស្ពឺ។
នគរបាលស្រុកឱរ៉ាល់ បានបញ្ជាក់ថាក្រោយទទួលបានពាក្យបណ្តឹង និង សំណូមពរ របស់ឈ្មោះ សេន មនោ ស្រ្តីរងគ្រោះ ជាម្តាយ សមត្ថកិច្ចនគរបាលជំនាញរបស់អធិការដ្ឋាននគរបាលស្រុកឱរ៉ាល់ រួមជាមួយកម្លាំងប៉ុស្តិ៍នគរបាលរដ្ឋបាលឃុំតាសាល ចុះទៅដល់កន្លែងកើតហេតុ ពិនិត្យ ស្រាវជ្រាវ ឃាត់ខ្លួនជនសង្ស័យខាងលើ និងដកហូតវត្ថុតាងមួយចំនួនដូចជា÷
១. ពូថៅចំនួន០១
២. ជំពាមកៅស៊ូអនឡាញ០១ និង គ្រាប់ប៉ាដាង០១ប្រអប់
៣.កន្ត្រៃតូចចំនួន០១ យកជនសង្ស័យនិងវត្ថុតាងខាងលើមកអធិការដ្ឋាននគរបាល ស្រុកឱរ៉ាល់ ដើម្បីធ្វើការសាកសួរ។
បន្ទាប់ពីធ្វើការសាកសួរយុវជន ជាជនសង្ស័យខាងលើបានឆ្លើយសារភាពថាខ្លួនពិតជាបានធ្វើសកម្មភាពវាយបំផ្លិចបំផ្លាញចង្ក្រាន ទ្វារ ចានឆ្នាំង ព្រមទាំងគំរាមសម្លាប់ទៅលើម្តាយ និង ជីដូនពិតប្រាកដមែន គឺសុំលុយពីម្តាយ ពីជីដូន ទិញគ្រឿងញៀន មិនបាន។
បច្ចុប្បន្ន យុវជនសង្ស័យឈ្មោះ សំ សិទ្ធ ត្រូវបានឃាត់ខ្លួននៅអធិការដ្ឋាននគរបាលស្រុក ឱរ៉ាល់ជាបណ្តោះអាសន្ន រង់ចាំ កសាងសំណុំបញ្ជូនបន្តដើម្បីចាត់ការតាមផ្លូវច្បាប់ ៕
