រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រ៉ូប៊ីអូ (Marco Rubio) បានបញ្ជាក់កាលពីថ្ងៃព្រហស្បតិ៍ ទី24 ខែកក្កដាថា ទីក្រុងវ៉ាស៊ីនតោន បានច្រានចោលផែនការរបស់លោកប្រធានាធិបតីប្រទេសបារាំង អែម៉ានូអែល ម៉ាក្រុង (Emmanuel Macron) ក្នុងការទទួលស្គាល់រដ្ឋប៉ាឡេស្ទីន។ លោកប្រធានាធិបតី ម៉ាក្រុង បានថ្លែងបញ្ជាក់ថា ប្រទេសបារាំង មានបំណងទទួលស្គាល់រដ្ឋប៉ាឡេស្ទីនមួយនៅក្នុងខែកញ្ញាខាងមុខ នៅមហាសន្និបាតអង្គការសហប្រជាជាតិ ដោយលោកសង្ឃឹមថាជំហាននេះ នឹងជួយនាំមកនូវសន្តិភាពដល់តំបន់មជ្ឈិមបូព៌ា។ ជាការឆ្លើយតប លោកនាយករដ្ឋមន្ត្រីអ៊ីស្រាអែល ប៊េនចាម៉ីនណេតាន់យ៉ាហ៊ូ (Benjamin Netanyahu) បានប្រកាសថ្កោលទោសលោកប្រធានាធីបតី ម៉ាក្រុង ខណៈដែលរដ្ឋមន្ត្រីការពារជាតិអ៊ីស្រាអែល លោក អ៊ីស្រាអែល ខាត់ បានហៅការសម្រេចចិត្តនេះថា ជា «ការអាម៉ាស់» និងជា «ការជំរុញដល់ក្រុមឃាតកហាម៉ាស់»។
