ភ្នំពេញ៖ 

សាកសពបុរសជនជាតិចិនម្នាក់ ត្រូវបានបុរសអ្នករត់ម៉ូតូកង់បីម្នាក់ប្រទះឃើញនៅមុខប៉ុស្តិ៍ភ្លើងឆេះរទេះ ដែលសង្ស័យជាអំពើឃាតកម្ម ខណៈរូបភាពកាមរ៉ាសុវត្ថិភាពគេឃើញមានរថយន្រ១គ្រឿងដឹកសពបុរសរងគ្រោះយកទៅទម្លាក់ចោលនៅទីនោះ រួចក៏ចាកចេញទៅបាត់ ។

ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង៣និង១៥នាទីទៀបភ្លឺថ្ងៃទី៣១ ខែកក្កដា ឆ្នាំ២០២៥ នៅតាមផ្លូវជាតិលេខ៣ ត្រង់ចំណុចទល់មុខសាលាបឋមសិក្សាទួលកីនិងទល់មុខប៉ុស្តិ៍នគរបាលប៉ុស្តិ៍ភ្លើងឆេះរទេះ ក្នុងភូមិព្រៃកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។ 

យោងតាមលិខិតឆ្លងដែន ជនរងគ្រោះខាងលើមានឈ្មោះ WU YONG  LONG

 (វូ យ៉ុង ឡុង) អាយុ២៤ឆ្នាំ ជនជាតិចិន មានរបួសលើខ្នង លើស្មានិងបែកក្បាលពីក្រោយខ្ទេចវ៉ល់ ។ នគរបាលក៏បានរកឃើញកាបូបស្ពាយពណ៍ប្រផេះ១ស្ថិតនៅជិងសាកសពផងដែរ ហើយនៅក្នុងកាបូបនោះមានទូរស័ព្ទដៃម៉ាកIPhone14 pro max១គ្រឿង លិខិតឆ្លងដែន និងកាតធនាគារATM ។

នគរបាលបានប្រប់ថា តាមការពិនិត្យលើលិខិតឆ្លងដែន បានឲ្យដឹងថាជនរងគ្រោះខាងលើទើបតែចូលមកដល់ប្រទេសកម្ពុជានាយប់ថ្ងៃទី៣០ ខែកក្កដា ឆ្នាំ២០២៥នេះប៉ុណ្ណោះ ។ នៅមុនពេលមានការភ្ញាក់ផ្អើលមានបុរសអ្នករត់ម៉ូតូកង់បីម្នាក់ ធ្វើដំណើរឆ្លងកាត់ទីតាំងកើតហេតុខាងលើ ហើយបានប្រទះឃើញសាកសពជនរងគ្រោះ ហើយបានរាយការណ៍ប្រាប់ឲ្យនគរបាលចេញទៅមើល ។ 

បន្ទាប់មក នគរបាល បានចុះទៅមើលនិងឆែកកាមេរ៉ាសុវត្ថិភាពដែលបំពាក់នៅប៉ុស្តិ៍ហើយបានឃើញនៅវេលាម៉ោង២និង៣០នាទីយប់រំលងអាធ្រាត្រឈានចូលថ្ងៃទី៣១  ខែកក្កដា ឆ្នាំ២០២៥ មានរថយន្ត១គ្រឿង បានដឹកសពបុរសនេះទៅទម្លាក់ចោលនៅទីនោះ រួចក៏ចាកចេញទៅបាត់ស្រមោល។ យោងតាមស្លាកស្នាមរបួសនិងរូបភាពកាមេរ៉ាសុវត្ថិភាពនោះ ត្រូវបានសង្ស័យថាជនរងគ្រោះស្លាប់ដោយអំពើឃាតកម្ម ហើយសាក សព ត្រូវបាននាំយកទៅដាក់នៅក្នុងវត្តជន្លង់ម្លូដើម្បីធ្វើកោសល្យវិច័យ រួចហើយដឹកបន្តទៅក្លាស្សេនៅក្នុងវត្តទឹកថ្លារង់ចាំស្វែងរកសាច់ញាតិ ៕