បន្ទាប់ពីគូស្នេហ៍របស់កញ្ញា លី អ៊ីវ៉ាធីណា បានធ្វើការសុំរៀបការយ៉ាងភ្ញាក់ផ្អើល និងអាចចាត់ទុកថាជាការសុំរៀបការដ៏ប្លែកមួយ ពោលគឺនៅក្នុងអាងហែលទឹកកាលពីពេលថ្មីៗកន្លងទៅនេះ ពេលនេះតារាចម្រៀងដែលនិយមច្រៀងជាភាសាចិនបានយ៉ាងល្អឥតខ្ចោះ កញ្ញា លី អ៊ីវ៉ាធីណា និងគូស្នេហ៍ដែលជាភេទដូចគ្នា បានភ្ជាប់ពាក្យតាមប្រពៃណីនៅចំពោះមុខមេបាទាំងសងខាងហើយ កាលពីថ្ងៃទី ១៧ ខែកក្កដា ឆ្នាំ២០២៥។
មិនតែប៉ុណ្ណោះ នៅក្នុងកម្មវិធីនេះ ក៏មានការចូលរួមពីមិត្តជិតស្និទ្ធរបស់ពួកគេ ដើម្បីជាសក្ខីស្នេហាមួយនេះផងដែរ។
ពិតជាដូចពាក្យគេតែងតែនិយាយថា ស្នេហាមិនប្រកាន់ភេទ ពណ៌សម្បុរពិតមែន កញ្ញា លី អ៊ីវ៉ាធីណា និងគូដណ្តឹងដែលជាស្រីដូចគ្នានេះ បានឱ្យដឹងបន្ទាប់ពីបញ្ចប់ពិធីភ្ជាប់ពាក្យរួចដែរថា អាពាហ៍ពិពាហ៍របស់ពួកគេទាំងពីរនឹងធ្វើឡើងនៅក្នុងឆ្នាំ ២០២៦ ខាងមុខនេះ។
យ៉ាងណាមិញ នៅក្នុងទិដ្ឋភាពដ៏កក់ក្តៅ និងមានអត្ថន័យ ដែលជាការចងចាំដ៏អស្ចារ្យ និងមិនអាចកាត់ថ្លៃបាននេះ កញ្ញា លី អ៊ីវ៉ាធីណា និងគូដណ្តឹង ក៏ទទួលបានសំឡេងសាទរ ការជូនពរពីសំណាក់ មិត្តភ័ក្រ្ត អ្នកគាំទ្រយ៉ាងច្រើនលើសលប់តែម្តង៕
