ភ្នំពេញ៖
ស្ត្រីមានវិបត្តិម្នាក់ ដែលបានជិះម៉ូតូទៅលោតទឹកសម្លាប់ខ្លួនពីលើស្ពានជ្រោយចង្វារកាលពីម្សិលមិញ បានអណ្ដែតឡើងហើយ! កាលពីវេលាម៉ោង ៥និង៤៥នាទីព្រឹកថ្ងៃទី២៣ខែកក្កដាឆ្នាំ២០២០២៥ក្នុងភូមិដើមគរ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
សពស្ត្រីរូបនោះឈ្មោះ សឿង គឹមលាង ភេទស្រី អាយុ៣១ឆ្នាំ មុខរបរលក់ដូរ ទីលំនៅភូមិពានាផ្សារ ឃុំក្ដឿងរាយ ស្រុកកញ្ច្រៀច ខេត្តព្រៃវែង។
ទាក់ទិនការធ្វើអត្តឃាតនេះ ស្រ្តីម្នាក់ឈ្មោះ ឃ្វាំង ភាព អាយុ៥៤ឆ្នាំ មុខរបរកសិករ ត្រូវជាម្ដាយរបស់សព បានឲ្យដឹងថាកូនស្រីរបស់គាត់ មានជំងឺសសៃប្រសាទ ហើយបានលេបថ្នាំជាប្រចាំ។ នៅពេលថ្មីៗនេះ អាការៈជំងឺកូនស្រី បានរើឡើង និង តែងតែឧស្សាហ៍រវើរវាយ។ នៅព្រឹកថ្ងៃទី២១ ខែកក្កដា ឆ្នាំ២០២៥ កូនស្រីបានជិះម៉ូតូមកលោតទឹកសម្លាប់ខ្លួនពីលើស្ពានជ្រោយចង្វារម្ដងមកហើយ តែត្រូវបានសមត្ថកិច្ចឃាត់ទាន់និងទាក់ទងគាត់ឲ្យមកទទួលត្រឡប់ទៅផ្ទះវិញ។ លុះនៅវេលាម៉ោងប្រហែល០៦និង៣០នាទីថ្ងៃទី២២ ខែកក្កដា ឆ្នាំ២០២៥ កូនស្រី បានជិះម៉ូតូឌុបកូនទៅសាលារៀនហើយមិនឃើញត្រឡប់មកផ្ទះវិញ ស្រាប់តែនៅវេលាម៉ោង ៩និង៣០នាទីព្រឹកមានសមត្ថកិច្ចទូរសព្ទមកប្រាប់ថា កូនស្រីរបស់គាត់លោតទឹកសម្លាប់ខ្លួនពីលើស្ពានជ្រោយចង្វារហើយលិចបាត់បន្សល់ទុកតែម៉ូតូមួយគ្រឿងនិងសម្ភារៈ។
តាមព័ត៌មានឲ្យដឹងទៀតថាបន្ទាប់ពីលោតទឹកលិចបាត់មួយយប់ នៅព្រឹកថ្ងៃទី២៣ ខែកក្កដា ឆ្នាំ២០២៥ នេះ សពបានអណ្ដែតឡើងនិងបានរសាត់តាមខ្សែទឹកហូរទៅទើរនៅច្រាំងទន្លេនៅភូមិដើមគរ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញហើយត្រូវបានសមត្ថកិច្ចអូសឡើងច្រាំងធ្វើការត្រួតពិនិត្យនិងទាក់ទងទៅក្រុមគ្រួសារ៕
