ត្បូងឃ្មុំ៖
រយៈពេលពីរថ្ងៃជាប់ៗគ្នា គឺថ្ងៃទី ២២ និងថ្ងៃទី ២៣ ខែកក្កដា ឆ្នាំ ២០២៥ កម្លាំង ការិយាល័យផលិតកម្ម និងបសុព្យាបាល ខេត្តត្បូងឃ្មុំ បានចុះអនុវត្តសកម្មភាពការងារ នៅកន្លែងផ្ទះជំងឺផ្តាសាយបក្សី ចំណុចភូមិបុស្សឫស្សី ឃុំដូនតី ស្រុកពញាក្រែក ខេត្តត្បូងឃ្មុំ បន្ទាប់ពីកុម៉ារម្នាក់ឈ្មោះ គា សុខកែវ ភេទប្រុស អាយុ ៦ ឆ្នាំ រស់នៅភូមិ បុសឬស្សី ឃុំដូនតី ស្រុកពញាក្រែក បានឆ្លងជំងឺ ផ្តាសាយបក្សី (H5N1) កំពុងសម្រាក ព្យាបាលនៅមន្ទីរពេទ្យគន្ធបុប្ផាភ្នំពេញ ដែលបានរកឃើញដោយវិទ្យាស្ថាន ជាតិប៉ាស្ពឺ (NIPH) ។
លោកស៊ីម ធី អនុប្រធានមន្ទីរកសិកម្ម រុក្ខាប្រមាញ់និងនេសាទខេត្ត បានឱ្យដឹងថាលោក បានដឹកនាំមន្ត្រីចុះអនុវត្តសកម្មភាពការងារនៅកន្លែងចំណុចខាងលើ ជាលទ្ធផលកម្លាំង បានបាញ់ថ្នាំសម្លាប់មេរោគចំនួន ២១ ខ្នងផ្ទះ និងតាមដងផ្លូវ ៦០០ ម បានផ្សព្វផ្សាយ ពីរបៀបការពារជាជំងឺផ្តាសាយបក្សីបានចំនួន ២០ គ្រួសារ និងបិទខិត្តប័ណ្ណផ្សព្វផ្សាយ ចំនួន ២៥០ ផ្ទាំង ហើយចែកថ្នាំសម្លាប់មេរោគចំនួន ៤ គ្រួសារ ។
លោក ស៊ីម ធី បន្តថា កម្លាំងបានធ្វើការសម្ភាសន៍ប្រជាពលរដ្ឋ ដែលធ្លាប់មានមាន់ឈឺ ចំនួន ១១ គ្រួសារ យកវត្ថុវិភាគមាន់ឈឺចំនួន ២ ក្បាល និងទាឈឺចំនួន ១ ក្បាលផងដែរ ។
ព្រមទាំងបានដុតកំទេចមាន់ចំនួន ២១៤ ក្បាល ទាចំនួន ៣៨ ក្បាល ពងមាន់ និងពងទា ចំនួន ១០ គ្រាប់ ជាងនេះទៀត កម្លាំងនឹងបន្តការងារផ្សព្វផ្សាយតាមសាលារៀនក្នុងភូមិ ដែលកើតជំងឺ ៕
