សហភាពសហព័ន្ធយុវជនកម្ពុជា នឹងរៀបចំការប្រកួតបាល់ទាត់ នៅថ្ងៃទី១៩ ខែកក្កដា ដើម្បីកៀរគរថវិកាគាំទ្រដល់កងកម្លាំងទ័ពជួរមុខ ដែលកំពុងឈរជើងនៅតាមបន្ទាត់ព្រំដែនកម្ពុជា-ថៃ។ កម្មវិធីដែលគ្រោងធ្វើឡើងនៅពហុកីឡដ្ឋានជាតិអូឡាំពិកហើយ ឯកឧត្តម ហ៊ុន ម៉ានី បានស្នើពលរដ្ឋគ្រប់រូប ឱ្យចូលរួមច្រៀងចម្រៀងជាតិរួមគ្នា ដើម្បីលើកទឹកចិត្តដល់កងទ័ពជួរមុខរបស់កម្ពុជា ដែលកំពុងការពារទឹកដីពីការឈ្លានពានរបស់ប្រទេសថៃ។
បើតាមការបញ្ជាក់ពីសំណាក់ ឯកឧត្តម ហ៊ុន ម៉ានី បានលើកឡើងថា ចម្រៀងជាតិរួមគ្នា ដែលត្រូវរួមគ្នាចៀងក្នុងការប្រកួតបាល់ទាត់ ដើម្បីកៀរគរថវិកាគាំទ្រដល់កងកម្លាំងទ័ពជួរមុខ នៅថ្ងៃទី១៩ ខែកក្កដា នោះ រួមមាន បទនគររាជ, បទពង្សាវតារខ្មែរ, បទដែនដីខ្មែរប្រែថាសុវណ្ណភូមិ និងបទគន់មើលទៅមេឃ ជាដើម។ បទចម្រៀងទាំងនេះ គឺសឹងសុទ្ធមានអត្ថន័យលើសពីចម្រៀង ហើយថែមជាពាក្យពេជ្របណ្ដាំដូនតា ដាស់ស្មារតីកូនខ្មែរឱ្យស្រឡាញ់ជាតិមាតុភូមិខ្លួន។
ឯកឧត្តម ឧបនាយករដ្ឋមន្ត្រី ហ៊ុន ម៉ានី ដែលជារដ្ឋមន្ត្រីក្រសួងមុខងារសាធារណៈផងនោះ បានបញ្ជាក់ថា គោលបំណងនៃការរៀបចំឱ្យមានការប្រកួតបាល់ទាត់ និងការច្រៀងចម្រៀងជាតិនេះ គឺមិនមានន័យឌឺដងទៅប្រទេសថៃនោះទេ។ ក៏ប៉ុន្ដែ វាជាសារទៅកាន់បរទេស ក៏ដូចជាបច្ចាមិត្តឱ្យដឹងថា ពលរដ្ឋខ្មែរចេះសាមគ្គីគ្នា និងចេះរក្សានៅបូរណភាពទឹកដីខ្លួន។
ម្យ៉ាងវិញទៀត កម្មវិធីនេះ គឺជាឱកាសសម្រាប់ពលរដ្ឋកម្ពុជា មកបង្ហាញនូវទឹកចិត្ត ស្មារតីស្នេហាជាតិ ការគាំទ្រ និងទំនុកចិត្តទៅលើរាជរដ្ឋាភិបាលរបស់ខ្លួន ក្នុងការដោះស្រាយបញ្ហាដោយសន្ដិវិធី និងមានភាពចាស់ទុំ។ ឯកឧត្តម ហ៊ុន ម៉ានី បានបន្ថែមថាព្រឹត្តិការណ៍នេះ ក៏ជាសារផ្ញើក្ដីនឹករំឭក ព្រមទាំងជាការកៀរគរថវិកាជួយដល់កងកម្លាំងទ័ព ដែលកំពុងការពារព្រំដែន ពីបច្ចាមិត្ត។
គួរជម្រាបថា ការប្រកួតបាល់ទាត់ ដើម្បីកៀរគរថវិកាគាំទ្រដល់កងកម្លាំងទ័ពជួរមុខ នឹងប្រព្រឹត្តិឡើងពហុកីឡដ្ឋានជាតិអូឡាំពិក ចាប់ពីម៉ោង៤រសៀល នៅថ្ងៃទី១៩ ខែកក្កដា។ ការប្រកួត គឺមានក្រុមកីឡាករចំនួន៨ក្រុមចូលរួម ។ ក្នុងនោះ ក្រុមបាល់ទាត់សម្ព័ន្ធយុវជនស្រលាញ់សន្តិភាព, ក្រុមបាល់ទាត់ សមាគមគ្រូពេទ្យស្ម័គ្រចិត្តយុវជនសម្តេចតេជោ, ក្រុមបាល់ទាត់Vlogger All Star, ក្រុមបាល់ទាត់សហព័ន្ធយុវជនបូជាការពារយុត្តិធម៌, ក្រុមបាល់ទាត់ពិធីករកីឡាកម្ពុជា, ក្រុមបាល់ទាត់ផ្ការីកគ្រប់រដូវ, ក្រុមបាល់ទាត់ ស ស យ ក អលស្តារ, និងក្រុមបាល់ទាត់តារាកម្ពុជា៕
