កំពង់ស្ពឺ ៖
ក្រុមជនសង្ស័យ ជាមុខសញ្ញាចែកចាយនិងជួញដូរគ្រឿងញៀនចំនួន០៣នាក់ត្រូវបានកំលាំងកងរាជអាវុធហត្ថក្រុងច្បារមន ធ្វើការស្រាវជ្រាវឃាត់ខ្លួនបន្តបន្ទាប់ ខណៈដែលក្រុមមុខសញ្ញាកំពុងចរាចរណ៍គ្រឿងញៀន ហើយកំលាំងសមត្ថកិច្ចចុះទៅប្រទះឃើញឃាត់តែម្តង។
ការឃាត់ខ្លួនក្រុមមុខសញ្ញាខាងលើ បានធ្វើឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី២៤ ខែកក្កដា ឆ្នាំ២០២៥ ស្ថិតនៅក្នុងភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
មន្ត្រីកងរាជអាវុធហត្ថក្រុងច្បារមន បាននិយាយឱ្យដឹងថា នៅមុនពេលឃាត់ខ្លួនក្រុមជនសង្ស័យជាមុខសញ្ញាខាងលើ គឺកម្លាំងមូលដ្ឋានកងរាជអាវុធហត្ថក្រុងច្បារមន ដឹកនាំដោយលោកវរៈសេនីយ៍ត្រី ធី ឆៃ បានសហការជាមួយកម្លាំងមន្ទីរស្រាវជ្រាវ និងបង្ក្រាបបទល្មើស ដែលដឹកនាំដោយលោកវរៈសេនីយ៍ទោ ណុល ដារ៉ា បានចុះទៅបង្រ្កាបករណីគ្រឿងញៀន ស្ថិតនៅភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ និង បានឃាត់ជនសង្ស័យចំនួន០២នាក់ភ្លាមៗ។
ជនសង្ស័យដែលឃាត់ខ្លួនបានមានឈ្មោះ ទី១-ឈ្មោះ ឃុន ណយ ភេទប្រុស អាយុ២៤ឆ្នាំ មុខរបរកម្មកររោងចក្រ ទីលំនៅបច្ចុប្បន្ន ស្ថិតនៅក្នុងភូមិទួល ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ និងទី២-ឈ្មោះ ភឿន ផាន ភេទប្រុស អាយុ៤៧ឆ្នាំ មុខរបរមិនពិតប្រាកដ ទីលំនៅបច្ចុប្បន្ន ភូមិឡរ ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ។
មន្ត្រីកងរាជអាវុធហត្ថក្រុងច្បារមន បានបញ្ជាក់ថាក្រោយពីធ្វើការសាកសួរជនសង្ស័យ ឈ្មោះ ឃុន ណយ កម្លាំងជំនាញកងរាជអាវុធហត្ថ បានបន្តស្រាវជ្រាវនិងឆែកឆេរនៅ ចំនុចផ្ទះជួលមួយកន្លែងស្ថិតនៅក្នុងភូមិបូរីកម្មករ សង្កាត់ច្បារមន ក្រុងច្បារមន ខេត្តកំពង់ស្ពឺ ឈានទៅឃាត់ខ្លួនជនសង្ស័យម្នាក់ទៀត ដែលជនសង្ស័យមានឈ្មោះ ពឹង ឡែន ភេទប្រុស អាយុ២៥ឆ្នាំ មុខរបរមិនពិតប្រាកដ មានទីលំនៅបច្ចុប្បន្ន ស្ថិតនៅក្នុងភូមិ វល្លិ៍ប្រេង ឃុំកាហែង ស្រុកសំរោងទង ខេត្តកំពង់ស្ពឺ។
បច្ចុប្បន្ន ក្រុមជនសង្ស័យទាំង០៣នាក់ខាងលើ រួមជាមួយនិងវត្ថុតាងខាងលើ កម្លាំងអាវុធហត្ថក្រុងច្បារមន បានកសាងនិង បញ្ជូនទៅបញ្ជាការដ្ឋានកងរាជអាវុធហត្ថ ខេត្តកំពង់ស្ពឺ ដើម្បីបន្តនីតិវិធី៕
