កាលពីថ្ងៃចន្ទ ទី14 ខែកក្កដា លោកប្រធានាធិបតីសហរដ្ឋអាមេរិក ដូណាល់ ត្រាំ បានប្រកាសជំហរតឹងរ៉ឹងប្រឆាំងនឹងប្រទេសរុស្ស៊ី ព្រមទាំងបានសន្យាថា នឹងបញ្ជូនគ្រាប់មីស៊ីល និងគ្រឿងសព្វាវុធផ្សេងទៀតសម្រាប់អ៊ុយក្រែន និងទុកពេលឲ្យទីក្រុងមូស្គូ 50 ថ្ងៃដើម្បីឈានដល់បទឈប់បាញ់មួយ ឬក៏ត្រូវប្រឈមមុខនឹងការដាក់ទណ្ឌកម្ម។ ការសម្រេចចិត្តរបស់លោកប្រធានាធិបតី ត្រាំ ក្នុងការបញ្ជូនអាវុធទៅឲ្យប្រទេសអ៊ុយក្រែន គឺជាចំណុចរបត់មួយសម្រាប់រូបលោក ដែលបានចំណាយពេលប៉ុន្មានខែដំបូងនៃអាណត្តិរបស់លោក ក្នុងការបញ្ចុះបញ្ចូលលោកប្រធានាធិបតីរុស្ស៊ី ពូទីន ឲ្យចូលតុចរចារដើម្បីឈានទៅដល់កិច្ចព្រមព្រៀងបទឈប់បាញ់នោះ។ គួរបញ្ជាក់ផងដែរថា នៅក្រោមកិច្ចព្រមព្រៀងនេះ លោកប្រធានាធិបតី ត្រាំ បាននិយាយថា សហរដ្ឋអាមេរិក នឹងផ្គត់ផ្គង់គ្រឿងសព្វាវុធទៅឲ្យប្រទេសអ៊ុយក្រែន ដែលនឹងត្រូវចំណាយដោយប្រទេសសមាជិកអង្គការណាតូ។
