ដ្បិតថា មានបទឈប់បាញ់ដោយគ្មានលក្ខខណ្ឌរវាងកម្ពុជា-ថៃ បានចូលជាធរមានកាលពីយប់ថ្ងៃទី ២៨ ខែកក្កដា ឆ្នាំ ២០២៥ វេលាម៉ោង ២៤:០០ និងស្ថានការណ៍នៅតាមព្រំដែនកំពុងវិលមករកសភាពប្រក្រតីដូចដើមក្តី តែបើក្រឡេកទៅមើលនៅលើបណ្តាញសង្គមនានា ជាពិសេសបណ្តាញសង្គម Twitter តារា និងបុគ្គលល្បីៗដែលមានឥទ្ធិពលសំឡេងនៅក្នុងប្រទេសថៃជាច្រើន បាននឹងកំពុងបំប៉ោងព័ត៌មានមិនពិតផ្សេងៗជាច្រើន ដោយទម្លាក់កំហុសមកលើកម្ពុជាទាំងស្រុងនៅក្នុងហេតុការណ៍នៃការផ្ទុះសង្គ្រាមនេះ។
ក្រោយពេលមានសង្គ្រាមនៅតាមបណ្តាញសង្គមបានកើតឡើងដោយសារ តារា និងបុគ្គលល្បីៗប្រចាំប្រទេសថៃទាំងនោះ ក៏មានតារា និងបុគ្គលល្បីៗប្រចាំប្រទេសកម្ពុជាជាច្រើន បានចេញមកតវ៉ាប្រឆាំង និងបដិសេធចំពោះព័ត៌មានក្លែងក្លាយដែលបង្កើតឡើងដោយពួកគេនៅតាមបណ្តាញសង្គមដូចគ្នាដែរ។
ក្នុងនោះ ស្រីនា ដែលជាអ្នកបង្កើតមាតិកាដ៏ពេញនិយមនៅក្នុងប្រទេសកម្ពុជា ក៏បានធ្វើការបញ្ចេញវីដេអូទី ២ របស់ខ្លួន កាលពីថ្ងៃទី 30 ខែកក្កដា ឆ្នាំ ២០២៥ បដិសេធចំពោះការលាបពណ៌ពីអ្នកមានឥទ្ធិពលនៅក្នុងប្រទេសថៃនៅតាមបណ្តាញសង្គមនានា ដោយក្មេងស្រីកម្ពុជារូបនេះ បានទទូចឱ្យមនុស្សដែលរស់នៅជុំវិញពិភពលោក ជឿជាក់មកលើកម្ពុជា ថាកម្ពុជាត្រូវបានគេរំលោភបំពានមុន មិនបានដូចអ្វីដែលពួកគេកំពុងតែនិយាយនោះទេ។ ស្រីនា ក៏បានឱ្យពួកគេស្វែងរកព័ត៌មានពិតជាក់លាក់ជាមុនសិន មុននឹងជឿទៅលើការនិយាយបំផ្លើសពីសំណាក់ជនជាតិថៃនៅលើបណ្តាញសង្គមទាំងនោះ៕
