ភ្នំពេញ៖
សពបុរសម្នាក់មានលក្ខណៈហើមស្អុយទៅហើយ ត្រូវបានគេប្រទះឃើញអណ្តែតទឹកទន្លេសាបដោយពុំស្គាល់អត្តសញ្ញាណឡើយ។
ហេតុការណ៍នេះ បង្កឲ្យមានតាមការភ្ញាក់ផ្អើលកាលពីវេលាម៉ោង៨និង៤០នាទីព្រឹក ថ្ងៃទី១៧ខែកក្កដា ឆ្នាំ២០២៥នៅចំណុចទន្លេសាបត្រើយខាងកើតក្នុងភូមិព្រែកសេក សង្កាត់ព្រែកតាសេក ខណ្ឌជ្រោយចង្វាររាជធានីភ្នំពេញ។
តាមអ្នកនេសាទជនជាតិអ៊ីស្លាម បានឱ្យដឹងថា នៅព្រឹកថ្ងៃកើតហេតុ គេឃើញសាកសពបុរសរូបនោះអណ្ដែតរសាត់តាមទឹកមកទើរនៅក្បែរច្រាំងទន្លេហើយបង្កឲ្យមានការភ្ញាក់ផ្អើលដល់ប្រជាពលរដ្ឋ រាយការណ៍ទៅសមត្ថកិច្ចដើម្បីចុះទៅត្រួតពិនិត្យ។
នៅព្រឹកនោះដែរ សមត្ថកិច្ចមូលដ្ឋានបានទាក់ទងទៅនគរបាលជំនាញកោសល្យវិច័យចាត់ចែងអូសសពឡើងច្រាំងដើម្បីត្រួតពិនិត្យ។ តាមការត្រួតពិនិត្យ សមត្ថកិច្ចរកពុំឃើញមានស្លាកស្នាមនិង អត្តសញ្ញាណឡើយ។
តាមការពិនិត្យកន្លែងកើតហេតុនិងសាកសព លោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញ បានសន្និដ្ឋានថា សពបុរសរូបនោះស្លាប់ដោយលង់ទឹក។ គេសង្ស័យថា បុរសរូបនោះលោតទឹកសម្លាប់ខ្លួនពីលើស្ពានជ្រោយចង្វារនិងស្ពានខ្សែកាបឬស្សីកែវ នៅពេលស្ងាត់ណាមួយហើយសពបានអណ្តែតឡើង៕
