បាត់ដំបង៖
យ៉ាងហោចណាស់បុរសជាអ្នកបើកបរម្នាក់បានស្លាប់ភ្លាមៗនិងអ្នករួមដំណើរ០២នាក់ផ្សេងទៀតរងរបួសធ្ងន់ស្រាល ក្រោយជួបឧបទ្ទវហេតុគ្រោះថ្នាក់ចរាចរណ៍នៅវេលាម៉ោង ២២និង៥០នាទី ថ្ងៃទី១៤ ខែកក្កដា ឆ្នាំ២០២៥ នៅចំណុចរង្វង់មូលថ្មគោល ស្ថិតក្នុងភូមិថ្មគោលខាងត្បូង ឃុំតាពូង ស្រុកថ្មគោល ខេត្តបាត់ដំបង ។
ប្រភពនៅកន្លែងកើតហេតុបានអោយដឹងថា ករណីគ្រោះថ្នាក់ចរាចរណ៍ខាងលើកើតឡើងរវាងម៉ូតូម៉ាកហុងដាឌ្រីមពណ៌ខ្មៅ០១គ្រឿង ពាក់ផ្លាកលេខបាត់ដំបង1AR-8783 បើកបរដោយបុរសម្នាក់និងអ្នករួមដំណើរ០២នាក់ទិសដៅពីលិចទៅកើត លុះមកដល់ចំណុចរង្វង់មូលថ្មគោលក៏បានបត់ឆ្លងផ្លូវ ភ្លាមនោះក៏មានរថយន្តក្រុង០១គ្រឿង ពាក់ផ្លាកលេខ ភ្នំពេញ 3B-2421 បើកបរទិសដៅពីជើងទៅត្បូង បានជ្រុលមកបុកគ្នាពេញទំហឹងបណ្តាលអោយបុរសអ្នកបើកបរម្នាក់ស្លាប់ភ្លាមៗនៅនឹងកន្លែងនិងបុរស០២នាក់ទៀតរងរបួសធ្ងន់ស្រាលតែម្តង។
ក្រោយពេលកើតហេតុសមត្ថកិច្ចជំនាញបានចុះទៅដឹកបញ្ជូនជនរងគ្រោះទៅសង្រ្គោះព្យាបាលនៅមន្ទីរពេទ្យ ចំណែកសាកសពត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី ដោយឡែកមធ្យោបាយទាំងពីរវាស់វែងយកទៅរក្សាទុកដើម្បីអនុវត្តតាមផ្លូវច្បាប់៕
