ភ្នំពេញ ៖
ទីតាំងលួចលាក់ប្រព្រឹត្តបទល្មើសឆកបោកតាមអនឡាញចំនួនពីរកន្លែង ត្រូវបានកម្លាំងចម្រុះនៃរដ្ឋបាលរាជធានីភ្នំពេញ ចុះបង្ក្រាបជាបន្តបន្ទាប់ដោយឃាត់ខ្លួនជនជាតិចិន ជនជាតិវៀតណាមនិងជនជាតិខ្មែរ សរុបចំនួន១៥២នាក់ និង ដកហូតវត្ថុតាងបានមួយចំនួនធំ។
ប្រតិបត្តិការនេះ ធ្វើឡើងជាបន្តបន្ទាប់កាលពីល្ងាចថ្ងៃទី ១៤និងថ្ងៃទី១៥ខែកក្កដាឆ្នាំ២០២៥ដឹកនាំដោយលោក ហ៊ុន សុរិ ទ្ធី អភិបាលរងរាជធានីភ្នំពេញ ។ ការចុះបង្ក្រាបបទល្មើសឆបោកតាមអនឡាញនេះ ត្រូវបានគេដឹងថា បន្ទាប់ពីមានបទបញ្ជាយ៉ាងម៉ុនម៉ាត់ពីសម្ដេចបវរធិបតីហ៊ុនម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា។
តាមព័ត៌មានពីសមត្ថកិច្ច ឲ្យដឹងថា កាលពីល្ងាចថ្ងៃទី១៤ ខែកក្កដា ឆ្នាំ២០២៥ កងកម្លាំងចម្រុះ បានចុះបង្ក្រាបទីតាំងខុនដូមួយកន្លែង ស្ថិតនៅក្នុងអគារលេខ១៥ ផ្លូវ១២៨ ភូមិ៦ សង្កាត់ផ្សារដេប៉ូទី១ ខណ្ឌ ទួលគោក រាជធានីភ្នំពេញ ដែលបានបង្កប់បទល្មើស ឆបោកអនឡាញ (Online Scams) ។
ក្នុងប្រតិបត្តិការបង្រ្កាបនោះ ក្រុមសមត្ថកិច្ច បានរកឃើញជនជាតិវៀតណាម ខ្មែរ សរុបចំនួន១៤៩នាក់ ដោយក្នុងនោះ មានស្រី២៣នាក់ ដែលមានមុខរបរ ជាជាងភ្លើង, កម្មករសំណង់, សន្តិសុខ មកពីក្រុមហ៊ុនសេវាកម្មសន្តិសុខឈ្មោះ ហាន ហុង, និងជាចុងភៅនិងកូនកាំបិត ផងដែរ។ ជនជាតិវៀតណាមដែលពាក់ព័ន្ធ ត្រូវបានសមត្ថកិច្ច អនុវត្តនីតិវិធីអន្តោប្រវេសន៍។ ចំណែកជនជាតិខ្មែរចំនួន៦៧នាក់ ស្រី១២នាក់ ព្រមទាំងមធ្យោបាយសម្ភារៈ បញ្ជូនទៅកាន់ស្នងការដ្ឋាននគរបាល រាជធានីភ្នំពេញដើម្បីបន្តអនុវត្តនីតិវិធី។
ដោយឡែក នៅថ្ងៃទី១៥ខែកក្កដាឆ្នាំ ២០២៥ កម្លាំងចម្រុះនៃរដ្ឋបាលរាជធានីភ្នំពេញ បានចុះបង្ក្រាបទីតាំងបង្កប់បទល្មើសឆបោកតាមអនឡាញមួយកន្លែងទៀត មានទីតាំងនៅក្នុងអគារខុនដូរ លេខ៣៨២ ផ្លូវឌួងងៀប ភូមិទ្រុងមាន់ សង្កាត់អូរបែកក្អម ខណ្ឌសែនសុខ ដោយឃាត់ខ្លួនជនជាតិចិនចំនួន៣នាក់ និងដកហូតវត្ថុតាំងមួយចំនួន។
តាមព័ត៌មានឲ្យដឹងថា នៅក្នុងប្រតិបត្តិការនោះ សមត្ថកិច្ចចម្រុះ បានធ្វើការត្រួតពិនិត្យឆែកឆេអគារខុនដូ៨ជាន់ នេះ បានរកឃើញជនសង្ស័យ ដោយឃាត់ខ្លួនជនជាតិចិនចំនួន០៣នាក់ និងសម្ភារៈដែលជាវត្ថុតាងមួយចំនួន រួមមានកុំព្យូទ័រ ចំនួន ៤៧គ្រឿង, Laptop ចំនួន ១៩គ្រឿង, iPad ចំនួន ១ គ្រឿង, ទូរស័ព្ទ ចំនួន ២៨គ្រឿង, ទូរដែក ចំនួន ៦គ្រឿង។ក្នុងនោះដែរ ក្រុមការងារក៏បានប្រមូលបានលិខិតឆ្លងដែន ចំនួន៨ ក្បាល និងចុងភៅ ចំនួន ៣នាក់ ស្រី១នាក់, អ្នកអនាម័យ ចំនួនម្នាក់ផងដែរ។
បច្ចុប្បន្ន អ្នកដែលត្រូវបានឃាត់ខ្លួន និងសម្ភារៈ ត្រូវបានប្រគល់ជូនស្នងការដ្ឋានរាជធានីភ្នំពេញ ដើម្បីបន្តអនុវត្តនីតិវិធី ដោយឡែកទីតាំងអគារខាងលើត្រូវបានបិទឃ្លុំបេបណ្តោះអាសន្ន៕
