រាជធានីភ្នំពេញ៖ នាព្រឹកថ្ងៃទី២១ ខែកក្កដា ឆ្នាំ២០២៥ សហព័ន្ធកីឡាប្រដាល់គុនខ្មែរ បានបើកវគ្គបណ្តុះបណ្តាលគ្រូបង្វឹកកីឡាប្រដាល់គុនខ្មែរ ស្តីពី “បទបញ្ជាបច្ចេកទេសគ្រប់គ្រងការប្រកួតកីឡាប្រដាល់គុនខ្មែរ” ក្រោមអធិបតីភាព ឯកឧត្តម ម៉ិល កាដូ ទីប្រឹក្សាក្រសួងអប់រំ យុវជន និងកីឡា និងជាអនុប្រធានសហព័ន្ធកីឡាប្រដាល់គុនខ្មែរ តំណាងឯកឧត្តម ឧត្តមសេនីយ៍ទោ ខូវ ឆាយ ប្រធានសហព័ន្ធកីឡាប្រដាល់គុនខ្មែរ នៅសាលប្រជុំនាយកដ្ឋានរៀបចំព្រឹត្តិការណ៍និងស្ថិតិកីឡា ពហុកីឡដ្ឋានជាតិអូឡាំពិក។

     ពិធីបើកវគ្គបណ្តុះបណ្តាលមានការអញ្ជើញចូលរួមពីសំណាក់ លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍និងស្ថិតិកីឡា លោក ទុយ ប៊ុនហឿន អនុប្រធាននាយកដ្ឋានកីឡាជំនាញ និងកីឡាមហាជន ឯកឧត្តម និន ភិរម្យ លោកសាស្ដ្រាវេជ្ជបណ្ឌិត ឆឹង យ៉ៅយ៉េន លោកព្រឹទ្ធាចារ្យ មាស សុខគ្រី អនុប្រធានសហព័ន្ធកីឡាប្រដាល់គុនខ្មែរ និងលោកឧត្តមសេនីយ៍ត្រី សៀន សុភក្ត្រ អគ្គលេខាធិការសហព័ន្ធកីឡាប្រដាល់គុនខ្មែរ ព្រមទាំងអស់លោក លោកស្រីដែលជាប្រតិបត្តិរបស់សហព័ន្ធកីឡាប្រដាល់គុនខ្មែរ។ 


  ឯកឧត្តម ម៉ិល កាដូ អនុប្រធានសហព័ន្ធកីឡាប្រដាល់គុនខ្មែរ បាមានប្រសាសន៍កោតសរសើរ និងវាយតម្លៃខ្ពស់ចំពោះក្រុមការងារ អនុប្រធាន សមាជិកប្រតិបត្តិសហព័ន្ធទាំងអស់ ដែលបានខិតខំប្រឹងប្រែងបំពេញភារកិច្ចយ៉ាងសកម្ម ក្នុងការរៀបចំវគ្គបណ្តុះបណ្តាលដ៏មានសារៈសំខាន់នេះ ព្រមទាំងអញ្ជើញស្ថាប័នពាក់ព័ន្ធ ដើម្បីពង្រឹងសមត្ថភាព និងបង្កើនធនធានគ្រូបង្វឹកនៅតាមសមាគម ក្លឹប ឱ្យការរៀបចំមានស្តង់ដាស្របតាមលក្ខណៈជាតិ និងអន្តរជាតិ។

ឯកឧត្តម មានប្រសាសន៍បន្ថែមថា ក្រសួងក៏បានកំណែទម្រង់ការប្រកួតកីឡាគ្រប់កម្រិត ដើម្បីឆ្លើយតបទៅនឹងការរីកចម្រើន ជាពិសេស ជំរុញ និងលើកទឹកចិត្តលើវិស័យកីឡាជាតិនៅក្នុងតំបន់ ព្រមទាំងផ្តល់ឱកាសឱ្យកីឡាករ កីឡាការិនី ទទួលបានការជ្រើសរើសចូលក្នុងក្រុមជម្រើសជាតិ ដើម្បីចូលរួមហ្វឹកហាត់ត្រៀមលក្ខណៈចូលរួមការប្រកួតនៅលើឆាកជាតិ និងអន្តរជាតិនានា ជាពិសេសត្រៀមខ្លួនឆ្ពោះទៅធ្វើជាម្ចាស់ផ្ទះនៃការប្រកួត “កីឡាយុវជនអាស៊ី (Asian Youth Games)” ឆ្នាំ២០២៩។



នាឱកាសប្រកាសបើកវគ្គបណ្តុះបណ្តាលនេះ ឯកឧត្តម ម៉ិល កាដូ បានផ្តាំផ្ញើរដល់សិក្ខាកាមទាំងអស់ដែលអញ្ជើញចូលរួមក្នុងវគ្គដ៏មានតម្លៃនាពេលនេះ ត្រូវយកចិត្តទុកដាក់ ខិតខំប្រឹងប្រែងក្រេបយកចំណេះដឹងថ្មីៗដែលគ្រូបានផ្តល់ឱ្យ ដើម្បីយកទៅអនុវត្តក្នុងការរៀបចំ ដឹកនាំសមាគម ក្លឹបរបស់ខ្លួន ឱ្យមានប្រសិទ្ធភាព។

សម្រាប់វគ្គបណ្តុះបណ្តាលគ្រូបង្វឹកកីឡាប្រដាល់គុនខ្មែរ ស្តីពី “បទបញ្ជាបច្ចេកទេសគ្រប់គ្រងការប្រកួតកីឡាប្រដាល់គុនខ្មែរ”នេះ មានសិក្ខាមចូលរួមចំនួន៤៩នាក់ ដែលអញ្ជើញមកពីបណ្តារសមាគម ក្លឹប ចំណុះសហព័ន្ធកីឡាប្រដាល់គុនខ្មែរ ដែលវគ្គនេះមានរយៈពេល ៥ថ្ងៃ៕