កំពង់ស្ពឺ៖
ក្មេងស្រីចំនួន០៣នាក់ បានស្លាប់ភ្លាមៗនៅកន្លែងកើតហេតុ ខណៈដែលជិះកង់០២គ្រឿងលើផ្លូវជាតិលេខ៤១ ហើយ រថយន្តប្រភេទតូរីបុកពីក្រោយ ពេញទំហឹង រីឯតៃកុងរថយន្ត រត់គេចខ្លួនបាត់ស្រមោល។
ហេតុការណ៍រថយន្តបុកកង់០២គ្រឿង សម្លាប់ក្មេងស្រីចំនួន០៣នាក់នេះ បានកើតឡើងកាលពីវេលាម៉ោង០២និង២០នាទីរសៀលថ្ងៃទី២៦ ខែកក្កដា ឆ្នាំ២០២៥ នៅលើកំណាត់ផ្លូវជាតិលេខ៤១ ចន្លោះបង្គោលគីឡូម៉ែត្រលេខ១៤-ទៅលេខ១៥ ត្រង់ចំណុចភូមិដូនកែវ ឃុំសែនដី ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទង បាននិយាយឱ្យដឹងថា នៅមុនពេលកើតហេតុ មានរថយន្ដ០១គ្រឿងម៉ាកស៊ាំយ៉ុង(ប្រភេទរថយន្តតូរីស) ពណ៌ស ពាក់ផ្លាកលេខភ្នំពេញ 2P-0642 អ្នកបើកបរមិនស្គាល់អត្តសញ្ញាណ (រត់គេចខ្លួនក្រោយពេលកើតហេតុរួច) បានបើកបរតាមបណ្តោយផ្លូវជាតិលេខ៤១ ក្នុងទិសដៅ ពីទិសខាងជើងទៅទិសខាងត្បូង លុះពេលធ្វើដំណើរ មកដល់ចំណុចកើតហេតុខាងលើ បានបុកប៉ះជាមួយក្មេងស្រី ជិះកង់ពីក្រោយពេញទំហឹង។
នគរបាលស្រុកសំរោងទង បានបន្តថា កង់ទី១-អ្នកជិះឈ្មោះ ផូ ចាន់រី ភេទស្រី អាយុ១៤ឆ្នាំ រស់នៅភូមិដូនកែវ ឃុំសែនដី ស្រុកសំរោងទង ខេត្តកំពង់ស្ពឺ មានអ្នកជិះក្រោយ ១នាក់ឈ្មោះ យីម គីមឆាយ ភេទស្រី អាយុ១១ឆ្នាំ រស់នៅភូមិសម្ដេចឪ ឃុំព្រៃញាតិ ស្រុកគងពិសី ខេត្តកំពង់ស្ពឺ និងកង់ទី២-អ្នកជិះឈ្មោះ ផល សុខនុត ភេទស្រី អាយុ ១២ឆ្នាំ រស់នៅភូមិសែនដី ឃុំសែនដី ស្រុកសំរោងទង ខេត្តកំពង់ស្ពឺ ដែលកំពុងជិះស្របទិសគ្នា បណ្ដាលឱ្យស្លាប់ទាំង០៣នាក់ភ្លាមៗនៅកន្លែងកើតហេតុតែម្តង។
ក្រោយកើតហេតុ នគរបាលជំនាញ ចុះទៅធ្វើការវាស់វែងនៅកន្លែងកើតហេតុ រីឯសពក្មេង ៗរងគ្រោះទាំង០៣នាក់ ត្រូវបានប្រគល់ជូនសាច់ញាតិក្រុមគ្រួសារយកទៅធ្វើបុណ្យតាមប្រពៃណី៕