ទោះបីជា បាល់ទាត់លើតុជាប្រភេទកីឡាមួយថ្មីសម្រាប់កម្ពុជា ប៉ុន្តែសហព័ន្ធកំពុងជំរុញឱ្យក្រុមជម្រើសជាតិវ័យក្មេងក្រោម១៧ឆ្នាំរបស់ខ្លួនបង្កើនការហ្វឹកហាត់បំប៉នបច្ចេកទេស ត្រៀមចូលរួមប្រកួតកីឡាយុវជនអាស៊ី នៅប្រទេសបារ៉ែន នាខែតុលា ឆ្នាំ២០២៥។
ថ្លែងប្រាប់ក្រុមអ្នកសារព័ត៌មាន អ្នកស្រី ងួន ច័ន្ទបូរមី គ្រូបង្វឹកក្រុមជម្រើសជាតិបាល់ទាត់លើតុកម្ពុជាបានគូសបញ្ជាក់ថា ក្រុមបាល់ទាត់លើតុកម្ពុជាបានត្រៀមខ្លួនរួចរាល់ សម្រាប់ការចូលរួមប្រកួតជាលើកដំបូងរបស់ខ្លួន ក្នុងចំណោមប្រភេទកីឡាជិត២០ទៀតរបស់កម្ពុជា ដែលនឹងត្រូវចូលរួមប្រកួតក្នុងព្រឹត្តិការណ៍កីឡាយុវជនអាស៊ី នាខែតុលា ឆ្នាំ២០២៥ នៅប្រទេសបារ៉ែន។ គ្រូបង្វឹករូបនេះបន្ថែមថា នៅក្នុងការបោះជំរំហ្វឹកហាត់មានរយៈពេល៣ខែនេះ គឺក្រុមបាល់ទាត់លើតុកម្ពុជាកំពុងប្រឹងប្រែងហ្វឹកហាត់យ៉ាងសកម្មជាមួយនឹងស្មារតីមោះមុតរបស់កីឡាករ ដើម្បីត្រៀមប្រកួតយុវជនដ៏ធំប្រចាំទ្វីបអាស៊ីមួយនេះ។ កីឡាករវ័យក្មេង២នាក់លើប្រភេទកីឡាបាល់ទាត់លើតុកម្ពុជា គឺកីឡាករ ម៉ឺន រ័តនា វ័យ១៥ឆ្នាំ និងកីឡាករ ជាតិ ខេមរាវិសុទ្ធ វ័យ១៦ឆ្នាំ។
អ្នកស្រី ងួន ច័ន្ទបូរមី សង្កត់ធ្ងន់ថា ក្នុងនាមជាអតីតកីឡាការិនីជម្រើសជាតិធ្លាប់ចូលរួមប្រកួតអន្តរជាតិជាច្រើនកន្លងមកតែងតែចែករំលែកបទពិសោធ និងការបណ្តុះស្មារតីកីឡាករយុវជនយើងឱ្យកាន់តែមានជំនឿចិត្ត មិនឱ្យភិតភ័យ ក្នុងការប្រកួតឡើយ។ គ្រូបង្វឹកបញ្ជាក់ថា បើទោះបីជានេះជាការចូលរួមលើកដំបូងរបស់ខ្លួន ប៉ុន្តែប្រភេទកីឡាបាល់ទាត់លើកម្ពុជានឹងប្រឹងប្រែងឱ្យអស់ពីសមត្ថភាព ដើម្បីដណ្តើមឱ្យបានលទ្ធផលណាមួយសម្រាប់ជាតិ។ ក្នុងនាមជាគ្រូបង្វឹក អ្នកស្រី ស្នើសុំឱ្យមហាជនចូលរួមគាំទ្រលើកទឹកចិត្តដល់ក្រុមកម្ពុជា ក្នុងបេសកកម្មអន្តរជាតិមួយនេះ៕
