កាលពីថ្ងៃពុធ ទី9 ខែកក្កដា លោកនាយករដ្ឋមន្ត្រីប្រទេសម៉ាឡេស៊ី អាន់វ៉ា អ៊ីប្រាហ៊ីម បានអំពាវនាវឲ្យបណ្តាប្រទេសអាស៊ីអាគ្នេយ៍ បង្កើនការធ្វើពាណិជ្ជកម្មរវាងគ្នានឹងគ្នា ក្នុងការប្រឈមមុខនឹងស្ថានភាពមិនច្បាស់លាស់នៃពិភពលោក។ ថ្លែងក្នុងកិច្ចប្រជុំរដ្ឋមន្ត្រីការបរទេសសមាគមប្រជាជាតិអាស៊ីអាគ្នេយ៍ ហៅកាត់ អាស៊ាន លោកនាយករដ្ឋមន្ត្រី អ៊ីប្រាហ៊ីម បានលើកឡើងអំពីបញ្ហាពន្ធគយ ការរឹតបន្តឹងការនាំចេញ និងរបាំងវិនិយោគ ថាជា "អាវុធដ៏មុតស្រួចនៃការប្រកួតប្រជែងភូមិសាស្ត្រនយោបាយ"។ គួរបញ្ជាក់ផងដែរថា កាលពីថ្ងៃចន្ទដើមសប្តាហ៍នេះ លោកប្រធានាធិបតីសហរដ្ឋអាមេរិក ដូណាល់ ត្រាំ បានប្រកាសពីការយកពន្ធបដិការចន្លោះពី 25% ទៅ 40% លើប្រទេសក្នុងតំបន់អាស៊ីអាគ្នេយ៍ចំនួន 6 ក្នុងនោះរួមមានប្រទេសម៉ាឡេស៊ីផងដែរ។