ប្រតិភូ គ្រូបង្វឹក និងកីឡាករ កីឡាការិនីកីឡាជឺជីតស៊ូកម្ពុជាចំនួន២១រូបបានចាកចេញពីអាកាសយានដ្ឋានអន្តរជាតិភ្នំពេញនៅរសៀលថ្ងៃពុធ ទី០៩ ខែកក្កដា ឆ្នាំ២០២៥ នេះដើម្បីឆ្ពោះទៅកាន់រដ្ឋធានីម៉ានីល ប្រទេសហ្វីលីពីន ចូលរួមការប្រកួតព្រឹត្តិការណ៍កម្រិតតំបន់អាស៊ីអាគ្នេយ៍ JJAU South East Asian Regional Championships 2025 ដែលប្រព្រឹត្តទៅនៅថ្ងៃទី១២ដល់ថ្ងៃទី១៣ ខែកក្កដា។
ឯកឧត្ដម ថោង បញ្ញាធន អគ្គលេខាធិការសហព័ន្ធកីឡាជឺជីតស៊ូកម្ពុជាមានប្រសាសន៍ថា នេះជាលើកទី២ហើយដែលសហព័ន្ធកីឡាជឺជីតស៊ូអាស៊ីអាគ្នេយ៍រៀបចំការប្រកួតកម្រិតតំបន់នេះឡើង ដោយលើកទី១ កាលឆ្នាំទៅមិញបានប្រព្រឹត្តទៅនៅកោះបាលី ប្រទេសឥណ្ឌូនេស៊ី។ សម្រាប់កម្ពុជាឆ្នាំនេះបានបញ្ជូនកីឡាករ កីឡាការិនីចំនួន១៨រូប ដែលនេះត្រូវបានចាត់ទុកជាចំនួនដ៏ច្រើនបំផុត និងច្រើនជាងការចូលរួមព្រឹត្តិការណ៍ជឺជីតស៊ូកម្រិតអាស៊ី និងពិភពលោកនាពេលកន្លងមកទៅទៀត។
ឯកឧត្ដម ថោង បញ្ញាធន សង្កត់ធ្ងន់ថា ការបញ្ជូនអត្តពលិកទៅចូលរួមព្រឹត្តិការណ៍ដ៏ធំប្រចាំតំបន់អាស៊ាននេះ ព្រោះចង់សម្រួចសមត្ថភាពកូនក្រុម ដើម្បីត្រៀមឆ្ពោះទៅព្រឹត្តិការណ៍កីឡាអាស៊ីអាគ្នេយ៍ឆ្នាំ២០២៥។ ដូច្នេះនេះជាឱកាសវាស់ស្ទង់គុណផល ថាតើ កីឡាករ កីឡាការិនីរូបណាមានសមត្ថភាពគ្រប់គ្រាន់សម្រាប់ព្រឹត្តិការណ៍ស៊ីហ្គេមចុងឆ្នាំនេះ។ កីឡាករកីឡាការិនីដែលត្រូវបានបញ្ជូនទៅចូលរួមសុទ្ធតែជាអ្នកធ្លាប់មានបទពិសោធក្នុងការប្រកួតកម្រិតអន្តរជាតិនៅក្រៅប្រទេស។
ជាមួយគ្នានេះ កីឡាករខ្មែរអាម៉េរិក២រូបក៏បានចូលរួមក្នុងក្រុមជម្រើសជាតិកម្ពុជាលើកដំបូងដែរ ខណៈពួកគេជាអ្នកមានបទពិសោធប្រកួតច្រើនដែរនៅសហរដ្ឋអាម៉េរិក។ ទាក់ទងទៅនឹងឱកាសជាប់ជម្រើសជាតិទៅស៊ីហ្គេម២០២៥សម្រាប់កីឡាករខ្មែរអាម៉េរិកថ្មីៗទាំង២ នោះគឺអាស្រ័យទៅលើការប្រកួតប្រជែងនៅហ្វីលីពីន និងការប្រៀបធៀបទៅនឹងសមត្ថភាពកីឡាករក្នុងស្រុកដែរ។
ឯកឧត្ដម ថោង បញ្ញាធន រំពឹងថា កូនក្រុមនឹងអាចធ្វើបានល្អ ហើយដណ្ដើមបានមេដាយគ្រប់ៗគ្នាដូចកាលទៅប្រកួតកម្រិតអាស៊ីនៅប្រទេសហ្សកដានី។ អគ្គលេខាធិការរូបនេះពិតជាសប្បាយចិត្តដែលសហព័ន្ធកីឡាជឺជីតស៊ូអាស៊ីអាគ្នេយ៍បានរៀបចំព្រឹត្តិការណ៍នេះក៏ដូចជាការប្រកួតផ្សេងទៀត ព្រោះជាឱកាសល្អសម្រាប់កីឡាករកីឡាការិនីជឺជីតស៊ូកម្ពុជាស្រូបទាញបានបទពិសោធច្រើន៕
