ភ្នំពេញ៖ 

ជនសង្ស័យ ចំនួន៣នាក់ ត្រូវបាននគរបាលព្រហ្មទណ្ឌខណ្ឌសែនសុខស្រាវជ្រាវឃាត់ខ្លួន បន្ទាប់ពីធ្វើសកម្មភាពលួចមានស្ថានទម្ងន់ទោស«ឆ្កឹះសោរទ្វាររបងបន្ទប់ជួល » ចូលលួចយកម៉ូតូ០២គ្រឿងនៅចំណុចបន្ទប់ជួល ផ្លូវលំ ភូមិទំនប់១ សង្កាត់ភ្នំពេញថ្មី ខណ្ឌសែន សុខ រាជធានីភ្នំពេញ កាលពីថ្ងៃទី១២ ខែកក្កដា ឆ្នាំ២០២៥ កន្លងមក។ 

ជនសង្ស័យដែលត្រូវឃាត់ខ្លួន១.ឈ្មោះ កែវ វេហា ភេទប្រុស អាយុ១៨ឆ្នាំ ,២.ឈ្មោះ សន លាភ ភេទប្រុស អាយុ១៤ឆ្នាំ និង៣,ឈ្មោះ សុខ ដេវីដ ភេទប្រុស អាយុ១៨ឆ្នាំ  ។ 

តាមនគរបាល បានឲ្យដឹងទៀតថាកាលពីថ្ងៃទី១២ ខែកក្កដា ឆ្នាំ២០២៥ វេលាម៉ោង ១១និង៤០នាទីយប់ ជនសង្ស័យមានគ្នាចំនួន ៤នាក់ បានធ្វើសកម្មភាពឆ្កឹះទាររបងផ្ទះជួល លួចយកម៉ូតូចំនួនពីរគ្រឿង ម៉ាកហុងដាសេ១២៥ ពណ៌ ខ្មៅ ស៊េរី២០២១ ពាក់ផ្លាកលេខ កំពង់ចាម 1AA-9082 មួយគ្រឿង និង ម៉ូតូម៉ាកនិច ពណ៌ស ពាក់ផ្លាកលេខ ភ្នំពេញ 1FB-8424មួយគ្រឿង នៅបរិវេណបន្ទប់ជួលជាន់ផ្ទាល់ដី ស្ថិតនៅផ្លូវលំ ភូមិទំនប់១ សង្កាត់ភ្នំពេញថ្មី ខណ្ឌសែនសុខ។

នៅក្នុងការធ្វើសកម្មភាព ជនសង្ស័យបានលួចយកម៉ូតូបានសម្រេចរួចគេចខ្លួន។ លុះនៅថ្ងៃថ្ងៃទី១៣ ខែកក្កដា ឆ្នាំ២០២៥ ជនរងគ្រោះដែលជាម្ចាស់ម៉ូតូទាំងពីរគ្រឿងក៍បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាល ភ្នំពេញថ្មីដើម្បីឲ្យជួយស្រាវជ្រាវ តាមកាម៉េរ៉ាសុវត្ថិភាព ឃើញរូបភាពសកម្មភាពជនសង្ស័យចំនួន០៤នាក់ ជិះម៉ូតូ០២គ្រឿង។ 

តាមនគរបាលខណ្ឌសែនសុខបានឲ្យដឹងថា ដោយទទួលបានបទបញ្ជាពីឯកឧត្តម ឧត្តមសេនីយ៍ឯក ជួនណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ និងក្រោមការដឹកនាំបញ្ជាផ្ទាល់ពីលោកវរៈសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានដឹកនាំកម្លាំងជំនាញព្រហ្មទណ្ឌខណ្ឌ ធ្វើការស្រាវជ្រាវហើយឈាន ទៅឃាត់ ខ្លួនបានជនសង្ស័យម្នាក់នៅក្នុងមូលដ្ឋានសង្កាត់ទឹកថ្លា កាលពីល្ងាចថ្ងៃទី ២២ខែកក្កដាឆ្នាំ២០២៥និងឈានទៅសហការជាមួយ អធិការនគរបាល ខណ្ឌពោធិសែនជ័យឃាត់ខ្លួនបានជនសង្ស័យ២នាក់ទៀតនៅភូមិព្រែកទាសង្កាត់ ចោមចៅទី៣ ខណ្ឌពោធិ៍សែនជ័យរាជធានីភ្នំពេញ។ បន្ទាប់ពីឃាត់ខ្លួន ជនសង្ស័យ បានសារភាពថាខ្លួនពិតជាបានធ្វើសកម្មភាពលួចយកម៉ូតូចំនួនពីគ្រឿងពិតប្រាកដមែនដោយអោយ បក្សពួករបស់ខ្លួនយកទៅលក់ហើយគេចខ្លួនបាត់៕