ព្រឹត្តិការណ៍កីឡារត់ប្រណាំងម៉ារ៉ាតុងចក្រភពអង្គរលើកទី១០ គ្រោងធ្វើឡើងនៅថ្ងៃទី៣ ខែសីហា ចំពីមុខប្រាសាទអង្គរវត្តដ៏អស្ចារ្យ នឹងត្រូវលើកពេលវេលា ព្រោះតែភាពតានតឹងនៃជម្លោះប្រដាប់អាវុធព្រំដែនរវាងកម្ពុជា និងថៃ។ នេះបើតាមការអះអាងរបស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ល្ងាចថ្ងៃទី២៧ ខែកក្កដា នេះ។
បើតាមឯកឧត្តម វ៉ាត់ ចំរើន បានបញ្ជាក់នៅតាមបណ្តាញសង្គមយ៉ាងដូច្នេះថា៖ «សូមជូនដំណឹងដល់អ្នករត់ជាតិ អន្តរជាតិទាំងអស់ថា ដោយសភាពការណ៍ទល់ដែនមានភាពតានតឹង គណៈកម្មាធិការជាតិអូឡាំពិកកម្ពុជា សូមលើកពេលរៀបចំព្រឹត្តិការណ៍ទិវារត់ប្រណាំងចក្រភពអង្គរលើកទី១០ គ្រោងធ្វើថ្ងៃទី ៣ ខែសីហា ឆ្នាំ២០២៥ នៅតំបន់អង្គរ ហើយនឹងជូនដំណឹងនាពេលក្រោយ ។ សូមអភ័យទោស និងសង្ឃឹមថា មានការយោគយល់ខ្ពង់ខ្ពស់។»។
មុនការប្រកាសផ្អាករៀបចំព្រឹត្តិការណ៍រត់ម៉ារ៉ាតុងចក្រភពអង្គរនេះ គណៈកម្មការរៀបចំការប្រកួត ធ្លាប់បានប្រកាសថាព្រឹត្តិការណ៍នេះ មានអ្នកចូលរួមរត់ប្រមាណជាង ៥ពាន់នាក់ បានចុះឈ្មោះរត់។ គូសបញ្ជាក់ថា ការសម្រេចចិត្តផ្អាករៀបចំព្រឹត្តិការណ៍ម៉ារ៉ាតុងចក្រភពអង្គរនេះធ្វើឡើងក្រោយពេលដែលកើតមានជម្លោះប្រដាប់អាវុតនៅតាមបណ្តោយព្រំដែន រវាងកម្ពុជា ជាមួយនឹងថៃ តាំងពីពេលដែលថៃ បានបើកការវាយប្រហារលើកងទ័ពកម្ពុជា នៅតំបន់ប្រាសាទតាមាន់ធំ ថ្ងៃទី២៤ កក្កដាមកម្ល៉េះ។ មកដល់ថ្ងៃទី២៧ កក្កដា ស្ថានភាពជម្លោះប្រដាប់អាវុធតាមព្រំដែន កាន់តែកើនឡើងកម្តៅខ្លាំងឡើង និងស្ថានភាពកាន់តែតានតឹង ធ្វើឱ្យជនភៀសសឹកជាពលរដ្ឋកម្ពុជា រស់នៅតាមស្រុក តាមបណ្តាខេត្តជាប់ព្រំដែនជាច្រើនម៉ឺននាក់ ត្រូវជម្លៀសចេញពីផ្ទះសម្បែង រត់ទីកន្លែងសុវត្ថិភាព ហើយសាលារៀនជាង ៦០០កន្លែងត្រូវបិទទ្វារ៕
