ភ្នំពេញ៖
បុរសម្នាក់ដែលមានមុខរបរគ្រូបង្រៀននៅសាលាអន្តរជាតិប៊ែលធី នៅពេលថ្ងៃ និងរត់ម៉ូតូកង់បីនៅពេលយប់នោះ បានស្លាប់បាត់បង់ជីវិតដោយជំងឺគាំងបេះដូង
នៅក្នុងបន្ទប់ជួលមួយកន្លែង ។
ហេតុការណ៍នេះ បានកើតឡើងកាលពីវេលាម៉ោង៦និង៥៥នាទីព្រឹកថ្ងៃទី២២ ខែកក្កដា ឆ្នាំ២០២៥ នៅក្នុងបន្ទប់ជួលលេខ៨ ស្ថិតនៅក្នុងភូមិត្រពាំងថ្លឹង៣ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
បុរសខាងលើឈ្មោះ ហេង សៅ អាយុ៥១ឆ្នាំ មុខរបរគ្រូបង្រៀននៅសាលាប៊ែល ធី និងរត់ម៉ូតូកង់បីនៅម្ដុំវត្តសំពៅមាស គាត់មានទីលំនៅភូមិអង្គរជ័យក្រោម ឃុំអង្គរជ័យ ស្រុកអង្គរជ័យ ខេត្តកំពត និងស្នាក់នៅក្នុងបន្ទប់ជួលកើតហេតុខាងលើ ។
នគរបាលបានប្រាប់ថា ក្រោយពេលទទួលបានដំណឹងថា មានមនុស្សស្លាប់បែបនេះ កម្លាំងអាជ្ញាធរមូលដ្ឋាន និងនគរបាលប៉ុស្តិ៍ចោមចៅទី១ បានចុះទៅពិនិត្យមើលនិងរាយការណ៍ជូននគរបាលការិយាល័យបច្ចេកទេសវិទ្យាសាស្រ្តនៃស្នងការនគរបាលរាជធានីភ្នំពេញចុះទៅពិនិត្យ និងធ្វើកោសល្យវិច័យហើយរកឃើញថាជនរងគ្រោះស្លាប់ដោយសារជំងឺគាំងបេះដូង ៕
