ភ្នំពេញ ៖
អំពើហិង្សាវាយតប់គ្នាមួយបានកើតឡើងរវាងអ្នករថយន្តតាក់សុីម្នាក់ទល់និងអ្នក លក់ខ្នាយតាន់ ចំនួន៤នាក់ បានបង្កឲ្យមានការភ្ញាក់ផ្អើលតាមដងផ្លូវ ហើយក៏ត្រូវបាន កម្លាំងនគរបាលប៉ុស្តិ៍កាកាបទី២ ចុះទៅអន្តរាគមន៍ឃាត់ខ្លួនទាំងសងខាងចំនួន៥នាក់ ។
ហេតុការណ៍នោះបានកើតឡើងកាលពីវេលាម៉ោង១២និង២០នាទីថ្ងៃត្រង់ថ្ងៃទី០៧ ខែកក្កដា ឆ្នាំ២០២៥ នៅតាមមហាវិថីសហព័ន្ធរុស្សុីប ត្រង់ចំណុចភ្លើងស្តុបស្តុបយូអេង ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
អ្នកបើកបររថយន្តតាក់សុីឈ្មោះសួន សាក់ ភេទប្រុសអាយុ៣២ឆ្នាំ មានទីលំនៅភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ ។ ចំណែកអ្នកលក់ខ្នាយតាន់ ឈ្មោះបង វែង ភេទប្រុស អាយុជាង៣០ឆ្នាំ មានទីលំនៅភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ ។ រីឯក្រុមគ្រួសារគាត់ដែលចូលរួមក្នុងឆាកបនរយុទ្ធនោះដែរ រួមមាន៖ ប្រពន្ធ កូនប្រុសម្នាក់និងបងប្អូនម្នាក់សរុប៤នាក់ ។
តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុអ្នកលក់ខ្នាយតាន់ បាន យកសម្ភារៈមួយចំនួនមសនដូចជាខ្នាយតាន់ បន្តោងខ្សែកព្រះ ខ្សែដៃអង្កាំជាដើមទៅដាក់ លក់តាមចិញ្ចើមផ្លូវត្រង់ចំណុចខាងលើ ដោយដាក់នៅកូនតុតូចមួយ ។ លុះដល់ពេលកើតហេតុស្រាប់តែបុរសអ្នកបើករថយន្តតាក់សុីបានបើករថយន្ត១គ្រឿងម៉ាកឡិចសុិសRX-300 ពណ័ស្ករ ពាក់ស្លាកលេខភ្នំពេញ 2AL-3615 ថយក្រោយកិនសម្ភារៈ ទាំងនោះ ហើយអ្នកលក់ខ្នាយតាន់បានប្រាប់ថា ថយកិនរបស់ខ្ញុំហើយ ។
ប្រភពដដែល បានឲ្យដឹងបន្តទៀតថា ពេលនោះអ្នកបើករថយន្តតាក់សុីបានឆ្លើយថា តើតុរបស់អ្ហែងហ្នឹងថ្លៃប៉ុន្មាន? រួចក៏ដើរចូលទៅក្នុងរថយន្តប្រុងបើកចេញទាំងមិនទទួល ខុសត្រូវ ។ ពេលនោះអ្នកលក់ខ្នាយតាន់បានរត់ទៅឃាត់និងដកយកសោរថយន្ត ប៉ុន្តែអ្នក បើកតាក់សុីប្រាប់ថា ខ្លួនមិនបានប្រុងគេចខ្លួនទេ គឺចូលយកដបទឹកនៅក្នុងរថយន្តមកផឹក ។ ខណៈនោះក៏មានទំនាស់គ្នា ហើយអ្នកបើករថយន្តតាក់សុីបានវាយអ្នកលក់ខ្នាយ តាន់៣ដៃ ទើបអ្នកលក់ខ្នាយតាន់ ក៏បានខលខលហៅប្រពន្ធនិងកូនប្រុស ព្រមទាំងបងប្អូន ឲ្យទៅជួយព្រួវាយទៅលើអ្នកបើករថយន្តតាក់សុីនោះវិញយ៉ាងចាស់ដៃ ។
ប្រភពខាងលើបានឲ្យដឹងថា បន្ទាប់មកក៏ត្រូវបានកម្លាំងនគរបាលប៉ុស្តិ៍កាកាបទី២ ចុះទៅ ឃាត់ខ្លួនទាំងសងខាងតែម្ដង ដោយឃាត់អ្នកលក់ខ្នាយតាន់ ប្រពន្ធរបស់គាត់រួមជាមួយ កូនប្រុសម្នាក់ និងបងប្អូនម្នាក់សរុប៤នាក់ ។ រីឯបុរសអ្នករត់តាក់សុីទ្រមខ្លួននិងត្រូវនគរបាលឃាត់ខ្លួនដែរ រួចនគរបាលបាននាំទៅកាន់ ប៉ុស្តិ៍កាកាបទី២ ក្រោយមកក៏បញ្ជូនបន្តទៅកាន់អធិការដ្ឋាននគរបាលខណ្ឌពោធិ៍សែនជ័យ ចាត់ការបន្ត ៕
