កាលពីចុងសប្តាហ៍កន្លងទៅនៅស្តីទីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានជួបសំណេះសំណាលជាមួយប្រតិភូកីឡានិស្សិតកម្ពុជា ដែលត្រៀមចូលរួមការប្រកួតកីឡាសាកលវិទ្យាល័យរដូវក្តៅពិភពលោកលើកទី៣២ ឆ្នាំ២០២៥ នៅទីក្រុង Rhine-Ruhr ប្រទេសអាល្លឺម៉ង់ ដែលនឹងប្រព្រឹត្តទៅ ចាប់ពីថ្ងៃទី ១៦ ដល់ថ្ងៃទី២៧ ខែកក្កដា ឆ្នាំ២០២៥។
ឯកឧត្តមបណ្ឌិតសភាចារ្យ ហង់ជួន ណារ៉ុន បានមានប្រសាសន៍ថា ការប្រកួតកីឡានិស្សិតនេះស្ថិតក្រោមការរៀបចំចាត់ចែងរបស់សហព័ន្ធកីឡាសាកលវិទ្យាល័យអន្តរជាតិ (FISU)រៀងរាល់២ ឆ្នាំម្តង ដោយប្តូរវេនរវាងប្រទេសជាសមាជិក ហើយតម្រូវឲ្យអ្នកចូលរួមត្រូវតែជានិស្សិតរៀនពេញម៉ោង និងមានអាយុមិនក្រោម ១៨ឆ្នាំ និងមិនលើស ២៥ឆ្នាំ។
ឯកឧត្តមរដ្ឋមន្ត្រីក្រសួងអប់រំបានបន្តថា ការប្រកួតធ្វើឡើងក្នុងគោលបំណងដើម្បីលើកកម្ពស់កីឡាអន្តរជាតិក្នុងចំណោមនិស្សិតដែលជាកីឡាករ កីឡាការិនី មកពីជុំវិញពិភពលោក បានចូលរួមប្រកួតប្រជែងក្នុងស្មារតីមិត្តភាព ការគោរព និងការលេងដោយយុត្តិធម៌ និងជំរុញការរួបរួមជាសាកល និងការផ្លាស់ប្តូរវប្បធម៌ក្នុងចំណោមយុវជនតាមរយៈកីឡា។
លើសពីនេះទៀត ទោះបីកម្ពុជាមិនទាន់មានលទ្ធភាពគ្រប់គ្រាន់ក្នុងការរៀបចំកីឡានិស្សិតកម្រិតពិភពលោកនេះក៏ពិតមែន ប៉ុន្តែកម្ពុជាយើងបានរៀបចំព្រឹត្តិរណ៍កីឡាលក្ខណៈជ្រើសរើសជើងតាមប្រភេទកីឡាកម្រិតពិភពលោកច្រើនលើកនិងទទួលបានលទ្ធលល្អជាច្រើន ពិសេស ការរៀបចំការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ នៅឆ្នាំ២០២៣ ទទួលជោគជ័យដ៏ធំធេង។
ឯកឧត្តមឧបនាយករដ្ឋមន្ត្រីបានបញ្ជាក់ថា កម្ពុជាកំពុងស្នើសុំគោលការណ៍ទៅ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា ដើម្បីទទួលធ្វើជាម្ចាស់ផ្ទះរៀបចំការប្រកួតកីឡាសាកលវិទ្យាល័យអាស៊ាន លើកទី២៣ ឆ្នាំ២០២៨ នៅព្រះរាជាណាចក្រកម្ពុជា ផងដែរ។
បើតាមរបាយការណ៍ពី ឯកឧត្តម ប៉ុន សុខ អគ្គនាយកដ្ឋានកីឡាបានបញ្ជាក់ឲ្យដឹងថា រាជរដ្ឋាភិបាលកម្ពុជា តាមរយៈក្រសួងអប់រំយុវជន និងកីឡា បានសម្រេចបញ្ជូនកីឡាចំនួន ៦ ប្រភេទទៅចូលរួម មានដូចជា៖
- កីឡាតេក្វាន់ដូ WT
- កីឡាគុនដាវ
- កីឡាហែលទឹក
- កីឡាអត្តពលកម្ម
- កីឡាវាយសី និង
- កីឡាយូដូ៕
