បវរកញ្ញាដែលពោរពេញទៅដោយបទពិសោធទាំងនៅលើឆាកជាតិ និងអន្តរជាតិ កញ្ញា កែវ សេងលីហួរ បានឱ្យតម្រុយថា នឹងបង្ហាញខ្លួនសារជាថ្មីនៅលើវិស័យប្រកួតសម្រស់ ខណៈពេលនេះនាងបាននឹងកំពុងពង្រឹងសមត្ថភាពទៅលើផ្នែកមួយចំនួនដែលគិតថាកំពុងខ្វះខាត។ លីហួរ ធ្លាប់ត្រូវបានតំណាងឱ្យប្រទេសកម្ពុជាទៅប្រកួតនៅលើឆាកអន្តរជាតិធំៗដូចជា Miss Earth ឆ្នាំ ២០១៨ នៅប្រទេសហ្វីលីពីន និង Miss Aura International ឆ្នាំ ២០២៤ នៅប្រទេសទួកគី។ មិនតែប៉ុណ្ណោះ នៅលើឆាកជាតិ លីហួរ ធ្លាប់បានប្រលងនៅក្នុងកម្មវិធី Miss Cambodia ឆ្នាំ ២០១៧ ចំណាត់ថ្នាក់លេខពីរ និងកម្មវិធី Miss Grand Cambodia ឆ្នាំ ២០២១ ចំណាត់ថ្នាក់លេខបី។ ជាមួយមហិច្ឆតាចង់ក្លាយជាម្ចាស់ជ័យលាភីលេខមួយនៅក្នុងប្រទេស បវរកញ្ញារូបនេះ បានឱ្យដឹងថានឹងបង្ហាញខ្លួនឆាប់ៗខាងមុខនេះ នៅលើវិស័យប្រកួតសម្រស់ណាមួយ ខណៈខ្លួនត្រូវបានមហាជនស្គាល់យ៉ាងច្រើន និងមានគ្រិះជាមួយបវរកញ្ញានេះផ្ទាល់តែម្តង។
លីហួរ ថា ប្រសិនបើជាមានឱកាសវិលត្រលប់មកសារជាថ្មីម្តងទៀត នឹងមានអ្វីដែលថ្មីប្លែកសម្រាប់អ្នកគាំទ្ររបស់ខ្លួនជាក់ជាពុំខាន ដោយនៅអំឡុងពេលនេះ បវរកញ្ញារាងខ្ពស់ស្រឡះរូបនេះ បាននឹងកំពុងមានការមមាញឹកជាមួយជំនួញផ្ទាល់ខ្លួន និងកំពុងបង្វឹកខ្លួនឯងបន្ថែមពីលើចំណុចខ្វះខាតមួយចំនួននៅឡើយ។
ទោះមិនទាន់ទទួលបានតំណែងជាជ័យលាភីលេខមួយពីវេទិកាប្រកួតសម្រស់នៅក្នុងស្រុកក្តី តែកញ្ញា កែវ សេងលីហួរ មិនដែលត្អូញត្អែរចំពោះលទ្ធផលដែលខ្លួនទទួលបាននាពេលកន្លងមកនោះទេ៕
