ភ្នំពេញ៖
បុរសជនជាតិចិនម្នាក់បើករថយន្តស៊េរីទំនើបមួយគ្រឿងម៉ាក Jeep ក្នុងល្បឿនលឿន បានបត់ទៅខាងស្ដាំដៃ ត្រូវរថយន្តស៊េរីទំនើបមួយគ្រឿងទៀតបើកស្របទិសគ្នា មកពីក្រោយបុកពេញទំហឹង បណ្ដាលឲ្យរងការខូចខាតយ៉ាងដំណំ។
ហេតុការណ៍នេះ បង្កឲ្យមានការភ្ញាក់ផ្អើលនៅវេលាម៉ោង ៤និង១០នាទី ទៀបភ្លឺ ឈានចូលថ្ងៃទី០៩ខែកក្កដា ឆ្នាំ២០២៥ នៅតាមបណ្ដោយផ្លូវ ៦០ម៉ែត្រ ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
បើតាមប្រភពព័ត៌មាន បានឲ្យដឹងថា នៅមុនពេលកើតហេតុ គេបានឃើញបុរសម្នាក់ដែលជាជនជាតិចិន បើករថយន្តស៊េរីទំនើបមួយគ្រឿងម៉ាក Jeep ពណ៌ខ្មៅ ពាក់ស្លាកលេខ ភ្នំពេញ 2BX-2299 ធ្វើដំណើរតាមបណ្ដោយផ្លូវ៦០ម៉ែត្រ ទិសដៅពីត្បូងទៅជើង ក្នុងល្បឿនលឿន។ លុះមកដល់ចំណុចកើតហេតុខាងលល បានបត់ទៅខាងស្ដាំដៃ ស្រាប់តែមានរថយន្តស៊េរីទំនើបមួយគ្រឿងទៀត ម៉ាក BMW ពណ៌ខ្មៅ ពាក់ស្លាកលេខ កម្ពុជា D.6886.T បើកស្របទិសគ្នាមកពីក្រោយ បុកពេញទំហឹង បណ្ដាលឲ្យរងការខូចខាត យ៉ាងដំណំ ។ សំណាងល្អ អ្នកបើកបររថយន្ត មិនមានរងរបួសធ្ងន់ធ្ងរនោះទេ ។
ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ បានទាក់ទងទៅសមត្ថកិច្ចជំនាញឲ្យចុះមកវាស់វែងយករថយន្តទាំងពីរទៅរក្សាទុករង់ចាំដោះស្រាយគ្នានៅពេលក្រោយ ៕