ថ្មីៗនេះ មហាជនអ្នកលេងបណ្តាញសង្គម និងអ្នកគាំទ្ររបស់តារាស្រីពូកែវោហារសព្ទ អ្នកនាង សុភ័ក្ត្រ កុសុម៉ា បាននាំគ្នាចែករំលែកវីដេអូ ដែលជាវីដេអូសម្ភាសនៅក្នុងកម្មវិធីអនឡាញមួយ បន្ទាប់ពីតារាស្រីរូបនេះ បាននិយាយគាស់កកាយនូវដំណើរនៅលើវិថីសិល្បៈរបស់ខ្លួន មុននឹងទទួលបានជោគជ័យមានឈ្មោះបោះសំឡេងដូចសព្វថ្ងៃនេះ។
នៅក្នុងវីដេអូសម្ភាសនោះ អ្នកនាង សុភ័ក្ត្រ កុសុម៉ា បានលើកឡើងពីការដឹងគុណទៅដល់សិល្បករ សិល្បការិនី មួយចំនួនដែលបានជួយជ្រោមជ្រែងអ្នកនាង ឱ្យមានមុខមាត់ឡើងវិញនៅក្នុងវិស័យសិល្បៈរហូតមកដល់ពេលនេះ។ ក្នុងនោះអ្វីដែលមហាជនបានចាប់អារម្មណ៍ខ្លាំង នោះគឺ អ្នកនាង សុភ័ក្ត្រ កុសុម៉ា បានបង្ហាញការដឹងគុណដល់ លោក តាប៊ុយ ដែលជាអតីតពិធីករក្នុងប៉ុស្តិ៍ទូរទស្សន៍មួយ បានជួយស្រោចស្រង់ និងស្តារកេរ្តិ៍ឈ្មោះអ្នកនាងឡើងវិញ បន្ទាប់ពីស្ងប់ស្ងាត់ខ្លាំងពីវិស័យសិល្បៈកាលគ្រានោះ។
យ៉ាងណាមិញ ក្រោយពេល លោក តាប៊ុយ បានឃើញវីដេអូសម្ភាសរបស់អ្នកនាង សុភ័ក្ត្រ កុសុម៉ា និយាយពីការដឹងគុណដល់ខ្លួនដូចនេះ លោកក៏បានតបទៅកាន់តារាស្រីរូបនេះថា អ្នកនាង ក៏ជាផ្នែកមួយដែលជួយធ្វើឱ្យកម្មវិធីរបស់លោកល្បីដូចគ្នាដែរ។ លោកបន្តថា ភាពជោគជ័យទាំងនេះ ក៏ដោយសារតែកើតមកពីសមត្ថភាពរបស់អ្នកនាង សុភ័ក្ត្រ កុសុម៉ា ផ្ទាល់ដូចគ្នាដែរ។
ខ្លឹមសារដែលលោក តាប៊ុយ បានបង្ហោះនៅលើបណ្តាញសង្គមមានអត្ថន័យពេញយ៉ាងដូច្នេះថា៖ “អរគុណដូចគ្នាបាទ ការងារមួយអាចជោគជ័យបានចាំបាច់ត្រូវមានមនុសល្អៗ ពូកែៗ ហើយក៏អរគុណគាត់ដូចគ្នា គឺគាត់មកជាមួយសមត្ថភាពគាត់ផ្ទាល់ គាត់ក៏ជាមនុស្សដែលធ្វើអោយពេញចិត្តឬអត់១ កាន់តែជោគជ័យ គាត់មានថ្ងៃនេះដោយសារតែខ្លួនគាត់ជាចំបង នៅជិតគាត់ទោះអ្នក depression ក៌បាត់អស់ដែរ ជូនពរគាត់កាន់តែជោគជ័យ”៕
