ការប្រកួតបាល់ទាត់ដើម្បីគៀងគររកមូលនិធិគាំទ្រវីរកងទ័ពជួរមុខ នៅថ្ងៃទី១៩ ខែកក្កដា ឆ្នាំ២០២៥ នាពហុកីឡដ្ឋានជាតិអូឡាំពិក ក្រោមប្រធានបទ «តស់! យើងទៅច្រៀងចម្រៀងជាតិផ្តល់កម្លាំងចិត្តជូនវីរកងទ័ពជួរមុខ» ដោយមានក្រុមបាល់ទាត់ចំនួន៨ក្រុមចូលរួមប្រកួត អ្វីដែលពិសេសទៀតនោះ ក៏មានការចូលរួមច្រៀងចម្រៀងរួមគ្នាបង្ហាញពីស្មារតីស្នេហាជាតិនិយមជាច្រើនបទ ជាមួយកំពូលតារាចម្រៀងល្បីៗនៅកម្ពុជាផងដែរ ។
សម្រាប់កម្មវិធីប្រកួតបាល់ទាត់ដើម្បីគៀងគររកមូលនិធិគាំទ្រវីរកងទ័ពជួរមុខ ដែលរៀបចំឡើងដើម្បីបង្ហាញអំពីស្មារតីសាមគ្គីភាពជាតិខ្មែរ ក្នុងនាមជាប្រជាជនជាខឿនជួរក្រោយ ជួយជួយគាំទ្រដល់កងទ័ពជួរមុខ ព្រមទាំងបង្ហាញអំពីស្មារតីជាតិនិយមរបស់ប្រជាជនកម្ពុជាស្ថិតនៅជាអមតៈ។
បើទោះបីជាយើងមកពីគ្រប់ទិសទី កន្លែង ពីស្ថាប័នផ្សេងៗគ្នា សំលៀកបំពាក់ផ្សេងៗគ្នា ប៉ុន្តែយើងមានទិសដៅនិងបេះដូង តែមួយគត់គឺសាមគ្គី រួបរួមគ្នា ដើម្បីផ្ដល់កម្លាំងចិត្ត គាំទ្ររដ្ឋាភិបាល និងផ្ដល់កម្លាំងចិត្តទៅកាន់វីរៈកងទ័ពជួរមុខរបស់កម្ពុជា ។
បន្ថែមពីនេះដើម្បីសម្តែងនូវការគាំទ្រដល់វីរភាពរបស់កងទ័ពកម្ពុជា ក៏ដូចជាការគាំទ្រដល់កីឡាបាល់ទាត់ជាតិរបស់យើង សូមអញ្ជើញបងប្អូនប្រជាពលរដ្ឋទាំងអស់ ចូលរួមទស្សនា និងទិញអាវយឺតដ៏ស្រស់ស្អាត ក្នុងតម្លៃត្រឹមតែ ២០,០០០ រៀលប៉ុណ្ណោះ សម្រាប់កម្មវិធីប្រកួតបាល់ទាត់ដើម្បីគៀងគររកមូលនិធិគាំទ្រវីរកងទ័ពជួរមុខ នៅថ្ងៃទី១៩ ខែកក្កដា ឆ្នាំ២០២៥ នាពហុកីឡដ្ឋានជាតិអូឡាំពិកនៅថ្ងៃប្រកួតផងដែរ។សម្រាប់បងប្អូនដែលមានបំណងបរិច្ចាគជាមូលនិធិសម្រាប់វីរកងទ័ពអាចចូលរួមតាមរយៈ៖ QR CODE ធនាគារចំនួន២ ដែលក្រុមការងារបានរៀបចំដាក់ក្នុងបណ្ណផ្សព្វផ្សាយ។
ចំពោះថវិកា ទទួលបានពីការលក់អាវយឺត នឹងត្រូវយកទៅបរិច្ចាគជូនដល់បងប្អូនកងទ័ពខ្មែរជួរមុខ ដែលបាននិងកំពុងឈរជើងនៅតាមខ្សែបន្ទាត់ព្រំដែនជាប់ប្រទេសថៃ ដើម្បីការពារបូរណភាពទឹកដី នៃព្រះរាជាណាចក្រកម្ពុជា។
