ប្រជាជនប៉ាឡេស្ទីនរាប់រយនាក់បានប្រមូលផ្តុំគ្នានៅទីក្រុង ប៊េ ឡាហីយ៉ា ភាគខាងជើងតំបន់ហ្គាហ្សា ដើម្បីរង់ចាំទទួលជំនួយស្បៀងអាហារ។ យោងតាមមន្ត្រីសុខាភិបាលក្នុងតំបន់ហ្កាហ្សា បានឲ្យដឹងថា គិតរហូតមកដល់ពេលនេះ ចំនួនជនជាតិប៉ាឡេស្ទីនដែលស្លាប់ដោយការវាយប្រហាររបស់អីស្រាអែលក្នុងតំបន់ហ្កាហ្សា បានកើនលើសពី 6 ម៉ឺននាក់ហើយ ក្នុងនោះចំនួនអ្នកស្លាប់ដោយសារការអត់ឃ្លាន និងខ្វះខាតអាហាររូបត្ថម្ភ បានកើនឡើងជារៀងរាល់ថ្ងៃ ដោយបច្ចុប្បនុ្ន កើនដល់ប្រមាណ 147 នាក់ ដែលក្នុងនោះភាគច្រើន គឺជាកុមារ។ យោងតាមទិន្នន័យ កាលពីខែមករា កុមារចំនួន 2846 នាក់ត្រូវបានធ្វើរោគវិនិច្ឆ័យថា មានកង្វះអាហារូបត្ថម្ភ ដែលជាតួលេខកើនឡើងច្រើនជាងទ្វេដងដល់ 5870 នៅក្នុងខែមិថុនា ហើយនៅក្នុងខែកក្កដា មនុស្សយ៉ាងហោចណាស់ 63 នាក់ រួមទាំងកុមារ 24 នាក់ដែលមានអាយុក្រោម 5 ឆ្នាំបានស្លាប់ដោយសារភាពអត់ឃ្លាន។ អង្គការឃ្លាំមើលភាពអត់ឃ្លានពិភពលោកបានបញ្ជាក់ថា វិបត្តិគ្រោះទុរ្ភិក្ស កំពុងកើតឡើងនៅតំបន់ហ្គាហ្សា ជាមួយនឹងកង្វះអាហារូបត្ថម្ភកើនឡើង ខណៈដែលកុមារអាយុក្រោម 5 ឆ្នាំជាច្រើនបានស្លាប់ ដោយភាពអត់ឃ្លាន។
