ភ្នំពេញ៖
បុរសជាជាងកាត់ដេរម្នាក់ បានចងកនិងកន្សែងពោះគោ ភ្ជាប់និងថ្នឹមដំបូលសំយាបផ្ទះ សម្លាប់ខ្លួន បន្ទាប់ពីវក់និងល្បែងអនឡាញ ជំពាក់គេវ័ណក។
ការធ្វើអត្តឃាតនេះ បង្កឲ្យមានការភ្ញាក់ផ្អើលកាលពីវេលាម៉ោង៩និង៣០នាទីព្រឹកថ្ងៃទី១១ខែកក្កដាឆ្នាំ ២០២៥ចំណុចផ្ទះលេខ១៣០៨ ផ្លូវលេខ១០០៧ ភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ បុរសដែលគិតខ្លីរូបនោះឈ្មោះ សួន ចំណាន អាយុ២៣ឆ្នាំ មុខរបរជាងកាត់ដេរ ទីលំនៅភូមិកណ្ដាលខ្ញូង ឃុំមហាខ្ញូង ស្រុកកោះសូទិន ខេត្តកំពង់ចាម ស្នាក់នៅផ្ទះជួលកើតហេតុខាងលើ។
តាមនគរបាលមូលដ្ឋាន បានឲ្យដឹងថាជាងកាត់ដេររូបនោះ បានចងកសម្លាប់ខ្លួននិងកន្សែងពោះគោជាប់ទៅនិងធ្នឹមដំបូលសំយាបផ្ទះ បន្ទាប់ពីវក់និងល្បែងជំពាក់ប្រាក់គេចំនួន ៦ ពាន់ដុល្លារ។
តាមការបំភ្លឺពីឈ្មោះ អ៊ាន ណេង ភេទប្រុស អាយុ៣៧ឆ្នាំ ជាបងប្រុសជីដូនមួយជនរងគ្រោះ បានឲ្យដឹងថា ប្អូនប្រុសជីដូនមួយរបស់ខ្លួន បានមកស្នាក់នៅធ្វើការជាមួយ ជាង២ខែមកហើយ។ កន្លងមកប្អូនប្រុស តែងតែលេងល្បែងអនឡាញ ហើយបានជំពាក់បំណុលគេជាច្រើន។ នៅព្រឹកថ្ងៃទី១១ ខែកក្កដា ឆ្នាំ២០២៥ ប្អូនប្រុស ភ្ញាក់ពីដេកហើយ អង្គុយស្រងូតស្រងាត់ និងយំផងហើយគាត់ ក៏បានដើរចេញទៅក្រៅដោយពុំបានចាប់អារម្មណ៍ឡើយ។ នៅវេលាម៉ោងប្រហែល០៩ និង៣០នាទី ដោយបាត់យូរពេក ក៏បានដើរទៅក្រោយផ្ទះ មើលស្រាប់តែឃើញប្អូនប្រុសជីដូនមួយ ចងកនិងកន្សែងពោះគោជាប់នឹងដែកធ្នឹមដំបូលសំយាបស្ដាប់បាត់ទៅហើយ។
តាមព័ត៌មានឲ្យដឹងទៀតថាបុរសជាជាងកាត់ដេររូបនោះបានវក់និងល្បែងជំពាក់ប្រាក់គេចំនួន៦ពាន់ដុល្លារ ហើយត្រូវបងជីដូនមួយឱ្យលុយយកទៅសងគេ ចាំសងបង់រំលោះវិញ តែប្អូនសងគេអស់៤ពាន់ដុល្លារ នៅសល់២ពាន់យកមកវិញ ស្រាប់តែចងកសម្លាប់ខ្លួនតែម្តង។ តាមការពិនិត្យកន្លែងកើតហេតុ និងសាកសពលោក ឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញបានសន្និដ្ឋានថា ជាងកាត់ដេររូបនោះស្លាប់ដោយ ចង ក ធ្វើ អត្តឃាត។ សពត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕
