កំពង់ស្ពឺ៖
បន្ទាប់ពីមានការអំពាវនាវរបស់រដ្ឋបាលខេត្តកំពង់ស្ពឺ កាលពីល្ងាចថ្ងៃទី២៧ ខែកក្កដា ឆ្នាំ២០២៥ ឯកឧត្តម ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងលោកស្រី រួមជាមួយថ្នាក់ដឹកនាំខេត្ត អភិបាលក្រុង បងប្អូនប្រជាពលរដ្ឋអ្នកខេត្តកំពង់ស្ពឺយើងយ៉ាងច្រើនកុះករ បានរួមគ្នាឧបត្ថម្ភគ្រឿង ឧបភោគបរិភោគ សម្ភារៈប្រើប្រាស់និងជាថវិកាជូនដល់កងកម្លាំងគ្រប់ប្រភេទនិងប្រជាពលរដ្ឋភៀសសឹកតាមការរយៈរដ្ឋបាលខេត្តកំពង់ស្ពឺ។ នេះហើយជាមហាកម្លាំងសាមគ្គីនៃប្រជាជាតិខ្មែរមកពីគ្រប់មជ្ឈដ្ឋាន គ្រប់និន្នាការនយោបាយ និងសាសនា ក្រោមស្មារតីខ្មែរតែមួយ គាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា ដែលកំពុងតែត្រូវការជំនួយ នៅឯព្រំដែនដែល កំពុងតែជួបក្នុងការឈ្លានពានរបស់សៀម។
អភិបាលខេត្តកំពង់ស្ពឺ ឯ.ឧ ជាម ច័ន្ទសោភ័ណ មានប្រសាសន៍ថា វីរៈកងទ័ពជួរមុខរបស់យើងជាសរសរគ្រឹះការពារទឹកដីដ៏រឹងមាំ ដោយពួកគាត់បានលះបង់ កម្លាំងកាយចិត្តព្រមទាំងអាយុជីវិតដើម្បីការពារមាតុភូមិនិងភាពសុខសាន្តរបស់ប្រជាពលរដ្ឋទូទាំងប្រទេស។ ដូច្នេះសម្រាប់យើងជាអ្នកនៅសមរភូមិក្រោយ សូមលើកទឹកចិត្តដល់កងទ័ពជួរមុខរបស់យើង មិននៅឯកោនោះទេ គឺមានប្រជាពលរដ្ឋកម្ពុជារាប់លាននាក់បាននិងកំពុងផ្ដល់នូវការលើកទឹកចិត្ត និងផ្ដល់ជាស្បៀងអាហារ មិនឱ្យខ្វះខាតឡើយ និងសូមជូនពរឱ្យកងទ័ពជួរមុខរបស់យើង ជួបតែសេចក្តីសុខ ជោគជ័យ យកឈ្នះលើសត្រូវឈ្លានពាន ៕
