មួយថ្ងៃបន្ទាប់ពីការសាកសួរក្រុមអ្នកគាំទ្រថាតើគួរបង្កើតគណបក្សនយោបាយថ្មីនៅអាមេរិក ឬអត់ លោកមហាសេដ្ឋី អ៊ីឡុន ម៉ាស (Elon Musk) បានប្រកាសថា "គណបក្សអាមេរិក ឬ អាមេរិកា ផាតធី (America Party) ត្រូវបានបង្កើតឡើង" ដើម្បីផ្តល់ឲ្យពលរដ្ឋអាមេរិក នូវសេរីភាព។ ការប្រកាសរបស់លោក ម៉ាស ធ្វើឡើងបន្ទាប់ពីលោកប្រធានាធិបតីសហរដ្ឋអាមេរិក ដូណាល់ ត្រាំ បានចុះហត្ថលេខាលើច្បាប់កាត់ពន្ធ និងចំណាយ កាលពីថ្ងៃសុក្រ ទី4 ខែកក្កដា ដែលលោកនាយកប្រតិបត្តិក្រុមហ៊ុន ថេសឡា (Tesla) រូបនេះ ធ្វើការជំទាស់យ៉ាងខ្លាំងនោះ។ លោក ម៉ាស បានចំណាយប្រាក់រាប់រយលានដុល្លារ នៅក្នុងយុទ្ធនាការបោះឆ្នោតរបស់លោកប្រធានាធិបតី ត្រាំ និងត្រូវបានដឹកតែងតាំងជារដ្ឋមន្ត្រីនាយកដ្ឋានប្រសិទ្ធភាព ក្រោមការគ្រប់គ្រងរបស់លោក ត្រាំ ក្នុងគោលបំណងកាត់បន្ថយការចំណាយរបស់រដ្ឋាភិបាលអាមេរិក ប៉ុន្តែជម្លោះបានផ្ទុះឡើងរវាងមេដឹកនាំទាំងពីរ ជុំវិញការមិនចុះសម្រុងគ្នាអំពីច្បាប់នេះ។ គួរបញ្ជាក់ផងដែរថា លោកប្រធានាធិបតី ត្រាំ កាលពីដើមសប្តាហ៍នេះ បានគំរាមកាត់ផ្តាច់ប្រាក់ឧបត្ថម្ភធនរាប់ពាន់លានដុល្លារ ដែលក្រុមហ៊ុនរបស់លោក ម៉ាស ទទួលបានពីរដ្ឋាភិបាលសហព័ន្ធ ខណៈដែលលោក ម៉ាស បានឆ្លើយតបថា លោកនឹងចាប់ផ្តើមគណបក្សនយោបាយថ្មីមួយ ហើយនឹងចំណាយប្រាក់ទៅឲ្យសមាជិកសភាដែលមិនមានកៅអី ដែលគាំទ្រសេចក្តីព្រាងច្បាប់នេះ។
