G-Dragon ត្រូវបានតែងតាំងជា ឯកអគ្គរដ្ឋទូតទំនាក់ទំនងសាធារណៈសម្រាប់កិច្ចប្រជុំកំពូល APEC ពីនាយករដ្ឋមន្ត្រីកូរ៉េខាងត្បូង

កាលពីថ្ងៃទី ២៣ ខែកក្កដា នាយករដ្ឋមន្ត្រីកូរ៉េខាងត្បូង លោក គីម មីន ស៊ុក (Kim Min-seok) បានប្រកាសតែងតាំង ជី ដ្រាហ្គន (G-Dragon) ជាឯកអគ្គរដ្ឋទូតទំនាក់ទំនងសាធារណៈសម្រាប់កិច្ចប្រជុំកំពូលអេពិក (APEC) តាមរយៈ Instagram ដោយបាន Tag គណនីរបស់ ជី ដ្រាហ្គន (G-Dragon) ព្រមជាមួយសំណេរថា "សុំណែនាំឯកអគ្គរដ្ឋទូតទំនាក់ទំនងសាធារណៈផ្លូវការសម្រាប់កិច្ចប្រជុំកំពូលអេពិក (APEC)" ។

លោកនាយករដ្ឋមន្រ្តី គីម មីនស៊ុក (Kim Min-seok) បាននិយាយថា "ខ្ញុំរីករាយក្នុងការចែករំលែកដំណឹងល្អនេះទៅកាន់អ្នកទាំងអស់គ្នា"។ លោកបន្ថែមថា "យើងសុំតែងតាំង ជី ដ្រាហ្គន (G-Dragon) ដែលជាសិល្បករកូរ៉េខាងត្បូងឈានមុខគេ ជាសិល្បករដែលបានបង្ហាញពីភាពច្នៃប្រឌិត និងនវានុវត្តន៍ជាបន្តបន្ទាប់ ក៏ដូចជាការបង្កើតព្រឹត្តិការណ៍តន្ត្រីគ្មានព្រំដែន មកជាឯកអគ្គរដ្ឋទូតទំនាក់ទំនងសាធារណៈសម្រាប់ អេពិក (APEC) កូរ៉េខាងត្បូងឆ្នាំ ២០២៥" នៅទីក្រុង គ្យុងជូ (Gyeongju)។ លោកបានបន្តទៀតថា “នៅសល់តែ ១០០ ថ្ងៃទៀតប៉ុណ្ណោះ រហូតដល់កិច្ចប្រជុំកំពូល ខ្ញុំសង្ឃឹមថា អ្នកទាំងអស់គ្នានឹងទន្ទឹងរង់ចាំកិច្ចសហការដ៏សំខាន់រវាង ជី ដ្រាហ្គន (G-Dragon) និង អេពិក (APEC) ដែលចាប់ផ្តើមពីថ្ងៃនេះតទៅ”។

ដោយឡែក ជី ដ្រាហ្គន (G-Dragon) ក៏បានបង្ហោះរូបភាពនៃការទទួលយកតំណែងជា ឯកអគ្គរដ្ឋទូតទំនាក់ទំនងសាធារណៈសម្រាប់កិច្ចប្រជុំកំពូលអេពិក (APEC) របស់គាត់ផងដែរ។

គួរឱ្យដឹងដែរថា ថ្មីៗនេះ ជី ដ្រាហ្គន (G-Dragon) បានចេញអាល់ប៊ុមទោលដំបូងរបស់ខ្លួនដែលមានឈ្មោះថា អ៊ូបឺម៉េន (Übermensch) ក្រោយខកខានអស់រយៈពេល ៧ ឆ្នាំ។ ក្នុងនោះរួមមានបទល្បីៗដូចជា ផៅវឺរ (POWER), ហូម ស្វីត ហូម (Home Sweet Home), ធូ ប៊ែដ (Too Bad) និង ដ្រាម៉ា (Drama) ជាដើម៕