អ្នកគ្រប់គ្រងលំដាប់ពិភពលោក AEG Present Asia បានចេញសេចក្តីប្រកាសជាផ្លូវការមួយ កាលពីថ្ងៃទី ១០ ខែកក្កដា ឆ្នាំ ២០២៥ កន្លងទៅថ្មីៗនេះថា ការប្រគុំតន្ត្រីរបស់ G-Dragon សមាជិកក្រុមចម្រៀងកូរ៉េបុរស BigBang ដែលមានឈ្មោះថា ជីដ្រាហ្គន ថ្វិនធីថ្វិនធីហ្វាយ វ៉ឺលដ៍ថួរ៍ អ៊ូបឺរ៍ម៉េន (G-DRAGON 2025 WORLD TOUR [Übermensch]) ដែលនឹងត្រូវធ្វើឡើងនៅទីក្រុងបាងកក ប្រទេសថៃ ត្រូវបានលុបចោលជាផ្លូវការហើយ។
នៅក្នុងសេចក្តីប្រកាសនេះមានខ្លឹមសារយ៉ាងដូច្នេះថា៖
“យើងមានសេចក្តីសោកស្ដាយជាខ្លាំងចំពោះការចែករំលែកដំណឹងអាក្រក់មួយនេះ ដោយសារកាលៈទេសៈដែលមិនបានមើលឃើញទុកជាមុន ដូចនេះការប្រគុំតន្ត្រីដែលមានឈ្មោះថា ជីដ្រាហ្គន ថ្វិនធីថ្វិនធីហ្វាយ វ៉ឺលដ៍ថួរ៍ អ៊ូបឺរ៍ម៉េន (G-DRAGON 2025 WORLD TOUR [Übermensch]) នៅទីក្រុងបាងកក សម្រាប់ថ្ងៃទី 2 ខែសីហា ខាងមុខនេះ ត្រូវបានលុបចោលជាផ្លូវការ។
យើងដឹងច្បាស់ថា មានអ្នកគាំទ្រជាច្រើនកំពុងរង់ចាំការប្រគុំតន្ត្រីនៅលើកនេះ ហើយយើងក៏សូមអភ័យទោសដោយស្មោះចំពោះការធ្វើឱ្យខកចិត្ត និងមិនអាចធ្វើឱ្យព្រឹត្តិការណ៍មួយនេះកើតឡើងមកបាន។
សូមអរគុណចំពោះការអត់ធ្មត់ និងការគាំទ្រជាបន្តបន្ទាប់របស់អ្នកទាំងអស់គ្នា។
យើងពិតជាកោតសរសើរចំពោះអ្នកគាំទ្ររបស់យើងនៅក្នុងប្រទេសថៃ ហើយសង្ឃឹមថានឹងបានជួបអ្នកម្តងទៀតក្នុងពេលឆាប់ៗនេះ”។
គួរឱ្យដឹងថា ការប្រគុំតន្ត្រីរបស់កំពូលតារាចម្រៀងប្រចាំប្រទេសកូរ៉េខាងត្បូង G-Dragon បាននិងកំពុងធ្វើឡើងនៅប្រទេសជាច្រើនលើពិភពលោកដូចជា ប្រទេស ជប៉ុន, ហ្វីលីពីន, ឥណ្ឌូនេស៊ី, អូស្ត្រាលី និងមានប្រទេសមួយចំនួនទៀតផងដែរ៕
