ភ្នំពេញ៖
រថយន្ត១គ្រឿងម៉ាកឡិចស៊ិសGS-300 បើកបរដោយជនជាតិចិន បសនបែកកង់ខណៈកំពុងបើកបរ ក៏រេចង្កូតជ្រុលទៅបុករបងថ្មផ្ទះអ្នកភូមិមួយកន្លែង បណ្ដាលឲ្យដាច់កាឡេទៅមុខលែងរួច ហើយ បុរសជនជាតិចិននោះបានទុករថយន្តចោលនៅកន្លែងកើតហេតុរួចចាកចេញទៅបាត់ ។
ហេតុការណ៍នេះ បានកើតឡើងកាលពីវេលាម៉ោង ១១ និង ៣០នាទីយប់ ថ្ងៃទី២០ ខែ កក្កដា ឆ្នាំ២០២៥ នៅតាមផ្លូវបេតុងភូមិកាកាប ភូមិកាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ប្រជាពលរដ្ឋ បាននិយាយថា នៅមុនពេលកើតហេតុ បុរសជនជាតិចិនម្នាក់បានបើកបររថយន្ត១គ្រឿង ម៉ាកឡិចស៊ិសGS-300 ពណ៌ស ពាក់ស្លាកលេខភ្នំពេញ2BB-5202 ធ្វើដំណើរតាមផ្លូវបេតុងខាងលើ ក្នុងទិសដីពីត្បូងទៅជើង។ លុះពេលទៅដល់ត្រង់ចំណុចកើតហេតុ ស្រាប់តែបែកកង់មុខខាងស្ដាំ រួចក៏រេចង្កូតជ្រុលទៅបុករបងថ្មផ្ទះប្រជាពលរដ្ឋ រួចក៏ទុករថយន្តចោលហើយគេចខ្លួនបាត់ស្រមោល ។
ប្រជាពលរដ្ឋ បាននិយាយបន្តថា រហូតដល់វេលាម៉ោង៧ព្រឹកថ្ងៃទី២១ ខែកក្កដា ឆ្នាំ២០២៥ ដោយមិនឃើញជនជាតិចិននោះ ទៅយករថយន្តវិញពួកគាត់ ក៏បានរាយការណ៍ជូននគរបាលប៉ុស្តិ៍កាកាបទី២ ឲ្យចុះទៅនាំយករថយន្តទៅរក្សាទុក ។
ក្រោយមក មានបុរសជនជាតិចិន២នាក់បានទៅកាន់ទីនោះ ហើយ បានសុំយករថយន្តនេះទៅវិញ ដោយអះអាងថាជារថយន្តមិត្តភក្ដិរបស់ខ្លួន ប៉ុន្តែនគរបាលបានប្រាប់ឲ្យយកឯកសារមកផ្ទៀងផ្ទាត់សិន ទើបប្រគល់ឲ្យវិញ ៕
 |
