ថ្មីៗនេះ យោងតាមការបង្ហោះសារខ្លីមួយនៅលើបណ្តាញសង្គមហ្វេសប៊ុកពី តារាចម្រៀងជួរមុខកម្ពុជា អ្នកនាង ពេជ្រ សូលីកា នឹងធ្វើសកម្មភាព ដើរថ្មើរជើង បង្ហាញពីកម្លាំង គាំទ្រសន្តិភាព នៅក្នុងខេត្តសៀមរាប។ សកម្មភាពនេះ មិនមែនទើបតែធ្វើជាលើកទីមួយនោះទេ ដោយកាលពីយប់ ថ្ងៃទី ២៦ ខែកក្កដា ឆ្នាំ ២០២៥ អ្នកនាង ពេជ្រ សូលីកា និងសាធារណជន រាប់រយនាក់ បានរួបរួមគ្នា ធ្វើយុទ្ធនាការ ក្នុងស្មារតីស្នេហាជាតិ ដោយបង្ហាញពីការដើរថ្មើជើង នៅលើផ្លូវថ្មើជើងចតុមុខ ស្រែកបន្លឺក្នុងសំឡេងតែមួយថា “កម្ពុជាត្រូវការសន្តិភាព” ព្រមទាំងក្នុងដៃកាន់ផ្ទាំងក្រដាសផ្សព្វផ្សាយ មានដាក់ Hashtag ផ្សេងៗជាដើម។

ដោយឡែកបើងាកទៅមើលសកម្មភាពការដើរថ្មើរជើងដែល អ្នកនាង ពេជ្រ សូលីកា មានគម្រោងធ្វើនៅក្នុងខេត្តសៀមរាបនេះ មានឈ្មោះថា “ថ្មើរជើងសន្តិភាព” ដោយទទួលបានការអនុញ្ញាតពីខាងអ្នករៀបចំសណ្ដាប់ធ្នាប់ខេត្តសៀមរាប និងពីអាជ្ញាធរជាតិអប្សរា។ សកម្មភាពនេះ បានធ្វើឡើងនៅទីតាំងចំនួនពីរ ទីតាំងទីមួយបានធ្វើនៅឡើងម្ដុំ Pub Street កាលពីល្ងាចថ្ងៃទី ២៨ ខែកក្កដា ឆ្នាំ ២០២៥ និងទីតាំងទីពីរបានធ្វើឡើងនៅ មុខបរិវេណប្រាសាទអង្គរវត្ត ឆ្ពោះ ទៅទីលានជល់ដំរី កាលពីព្រឹក ថ្ងៃទី ២៩ ខែ កក្កដា ឆ្នាំ ២០២៥។

អ្នកនាង ពេជ្រ សូលីកា ក៏បានស្នើរសុំដល់បងប្អូនទាំងអស់ សូមកុំចែករំលែករូបភាពនៃការដើរថ្នើរជើងនេះ ទៅជារូបភាពនៃការបាតុកម្ម ព្រោះការដើរនេះគឺដើម្បីចង់បាន សន្តិភាព និង ភាពយុត្តិធម៌ ដល់ប្រទេសជាតិ៕