ជាការពិតណាស់ បើនិយាយពីភាពល្បីល្បាញរបស់ BTS ក្រុមចម្រៀងបុរសកូរ៉េ នៅតែមានឥទ្ធិពលសម្រាប់អ្នកគាំទ្ររបស់ខ្លួននៅទូទាំងពិភពលោក។ ជាមួយគ្នានេះ V ដែលត្រូវបានគេដឹងថាជាសមាជិកម្នាក់របស់ក្រុមខាងលើ បានសាងភាពភ្ញាក់ផ្អើលសារជាថ្មី បន្ទាប់ពីរំសាយចេញពីក្រុមយោធាកាលពីពេលថ្មីៗនេះ។
ក្រោយចូលវិស័យសិល្បៈវិញ តារាប្រុសរូបនេះបានឈរនៅលេខរៀងទី ១ ក្នុងនាមជាបុគ្គលមានឥទ្ធិពលបំផុតនៅលើបណ្តាញសង្គម Instagram របស់អាស៊ី និងជាប់នៅលេខរៀងទី ៣ របស់ពិភពលោក បន្ទាប់ពី គ្រីស្ទីណូ រូណាល់ដូ (Cristiano Ronaldo និង លីអូណែល មេសស៊ី (Lionel Messi)។
ការចាត់លេខរៀងនៅលើកនេះគឺបានមកពី ហាយផ៍ អកឌិថឺរ៍ (HypeAuditor) កម្មវិធីវិភាគ Influencer លំដាប់ថ្នាក់ពិភពលោក ដែលបានធ្វើចំណាត់ថ្នាក់ ១០០០ Influencer ដែលមានឥទ្ធិពលបំផុត ហើយក្នុងនោះ V នៅតែក្តោបបានក្តីស្រឡាញ់ពីអ្នកគាំទ្រនៅទូទាំងពិភពលោក បើទោះបីជាបានផ្អាកពីវិស័យសិល្បៈមួយរយៈធំក្តី។
អ្វីដែលរឹតតែរំភើបជាងនេះទៅទៀតនោះ V គឺជាបុគ្គលមកពីអាស៊ីតែម្នាក់គត់ដែលអាចឡើងទៅកាន់តំណែងលេខ១ ប្រចាំតំបន់ និងវ៉ាដាច់បុគ្គលល្បីឈ្មោះជាច្រើនទៀតនៅទូទាំងអាស៊ី មិនថាតែជា តារាសម្តែង តារាចម្រៀង ឬ បុគ្គលល្បីៗតាមបណ្តាញសង្គមជាដើម៕
