តារាចម្រៀង និងតារាសម្ដែងពហុជំនាញ IU បានសាងចំណាប់អារម្មណ៍សារជាថ្មីម្ដងទៀត បន្ទាប់ពីដណ្តើមបានពានរង្វាន់ “តារាសម្ដែងស្រីឆ្នើម” នៅក្នុងខ្សែភាពយន្តភាគរឿង វ៉េន ឡាយហ្វ៍ ហ្គីវស៍ យូ ធែនដ្យឹរីនស៍ (When Life Gives You Tangerines) ពីកម្មវិធីប្រគល់ពានរង្វាន់ ប្លូ ដ្រាហ្គន ស៊េរី (Blue Dragon Series) លើកទី ៤ ដែលបានធ្វើឡើងនៅថ្ងៃទី ១៨ ខែកក្កដា ឆ្នាំ ២០២៥ កន្លងទៅ។
ព្រឹត្តិការណ៍នេះប្រមូលផ្តុំទៅដោយតារាល្បីៗ និងមានពិធីករដំណើរការកម្មវិធីគឺលោក ជុន យ៉ុន ម៉ូ (Jun Hyun Moo) និងតារាសម្តែងស្រី អ៊ីម យ៉ូន អា (Im Yoon Ah)។ សម្រាប់ពានរង្វាន់ “តារាសម្ដែងស្រីឆ្នើម” ឆ្នាំនេះមានបេក្ខភាពដាក់ពាក្យប្រកួតប្រជែងច្រើនគួរឱ្យកត់សម្គាល់រួមមាន ផាក អ៊ុន ប៊ីន (Park Eun Bin) តារាសម្តែងស្រីនៅក្នុងរឿង ហាយផឹ នាយហ្វ៍ (Hyper Knife), ស៊ូ យ៉ុន ជីន (Seo Hyun Jin) តារាសម្តែងស្រីនៅក្នុងរឿង ដឹ ថ្រាង (The Trunk), យ៉េរិ (Hyeri) តារាសម្តែងស្រីនៅក្នុងរឿង ហ្វ្រេនលី រ៉ាយវ៉លលី (Friendly Rivalry) និង ឆា ជូ យ៉ាំង (Cha Joo Young) តារាសម្តែងស្រីនៅក្នុងរឿង ដឹ ឃ្វីន ហ៊ូ ខ្រោន (The Queen Who Crowns)។
ដ្បិតថាមានការដាក់ពាក្យដណ្តើមពានរង្វាន់ច្រើនពីសំណាក់តារាសម្តែងខាងលើក្តី ប៉ុន្តែការសម្ដែងដ៏ទាក់ទាញរបស់ IU ដើរតួជា អូ អេ សាន់ (Oh Ae-sun) និង យ៉ាង ហ្គម ម្យ៉ុង (Yang Geum-myung) នៅក្នុងរឿង វ៉េន ឡាយហ្វ៍ ហ្គីវស៍ យូ ធែនដ្យឹរីនស៍ (When Life Gives You Tangerines) មិនត្រឹមតែឆក់យកបេះដូងទស្សនិកជនប៉ុណ្ណោះទេ ថែមទាំងអាចឆក់យកបេះដូងរបស់គណៈកម្មការថែមទៀតផង។
ក្នុងពេលទទួលពានរង្វាន់របស់នាង IU បាននិយាយថា នាងពិតជារំភើបដែលទទួលបានឱកាសសម្តែងជាតួអង្គទាំងនេះ ហើយក៏បានថ្លែងអំណរគុណដល់អ្នកដឹកនាំ អ្នកនិពន្ធ និងគ្រប់គ្នាដែលបានចូលរួមបង្កើតស្នាដៃដ៏មានមោទនភាពបំផុតមួយ ដែលជាផ្នែកមួយនៅក្នុងជីវិតនាងបែបនេះ។
ក្រៅពីនេះ IU ក៏បានថ្លែងអំណរគុណដល់ស្ត្រីគ្រប់រូបដែលមានខ្សែជីវិតដូចជា អូ អេ សាន់ (Oh Ae-sun) ដែលរស់នៅក្នុងពិភពលោកដ៏ស្រពិចស្រពិល និង យ៉ាង ហ្គម ម្យ៉ុង (Yang Geum-myung) ស្ត្រីដែលមានក្តីស្រមៃ និងហ៊ានធ្វើតាមក្តីស្រមៃរបស់ខ្លួនឯង។ នាងបានបញ្ចប់ដោយនិយាយថា “ខ្ញុំសូមគោរព និងដឹងគុណចំពោះស្ត្រីគ្រប់រូបដែលមានក្តីស្រមៃ និងក្រោកឈរតតាំងដើម្បីជីវិត”៕
