“ចយ” (JOY) សមាជិកក្រុម “រ៉េត វ៉េលវ៉េត” (Red Velvet) កំពុងត្រៀមខ្លួនសម្រាប់ការវិលត្រលប់មកវិញក្នុងនាមជាតារាចម្រៀងទោលម្តងទៀត ជាមួយ Mini Album ដែលមានចំណងជើងថា “ហ្វ្រម ចយ វីត ឡើប” (From JOY, with Love) នៅថ្ងៃទី ១៨ ខែសីហា ឆ្នាំ ២០២៥។ Mini Album នេះ នឹងមកជាមួយបទចម្រៀងចំនួនប្រាំមួយបទ។ នាងបានឱ្យដឹងថា អាល់ប៊ុមនេះនឹងនាំអារម្មណ៍អ្នកស្តាប់ទៅស្វែងយល់ពីទម្រង់ផ្សេងៗនៃស្នេហាដែល “ចយ” (JOY) ធ្លាប់ឆ្លងកាត់តាំងពីអាយុ ១០ ឆ្នាំ ដល់អាយុ ២០ ឆ្នាំ ព្រោះនាងគិតថា ស្នេហាគឺជារបស់ដ៏មានតម្លៃបំផុតនៅក្នុងជីវិត ហើយនាងចង់បង្ហាញប្រាប់ពីរឿងនេះតាមរយៈបទចម្រៀងទាំងនោះ។

ចាត់ទុកថានេះគឺជាការបញ្ចេញ Mini Album ទោលសារជាថ្មីម្តងទៀតរបស់ “ចយ” (JOY) បន្ទាប់ពីខកខានអស់រយៈជិត 4 ឆ្នាំកន្លងមកនេះ ខណៈដែលនាងធ្លាប់បានចេញ EP Album ម្តងរួចមកហើយដែលមានឈ្មោះថា "Hello" ដែលយកបទល្បីៗចាស់ៗមកផលិតសារឡើងវិញ។ ដោយឡែកសម្រាប់ Mini Album ដែលមានចំណងជើងថា “ហ្វ្រម ចយ វីត ឡើប” (From JOY, with Love) វានឹងក្លាយអាល់ប៊ុមដែលបង្ហាញពីអត្តសញ្ញាណ និងទស្សនៈរបស់នាងយ៉ាងពេញលេញចំពោះស្នេហាដែលធ្លាប់បានឆ្លងកាត់។

យ៉ាងណាមិញ អ្នកគាំទ្ររបស់នាង ក៏បាននឹងកំពុងរង់ចាំការបញ្ចេញជាផ្លូវការនូវ Mini Album ខាងលើ របស់តារាចម្រៀងស្រីរូបនេះយ៉ាងអន្ទះសារផងដែរ៕