បន្ទាប់ពីប្រឡូកក្នុងវិស័យសិល្បៈអស់រយៈពេលយ៉ាងយូរ កំពូលតារាសម្តែងស្រី ជុន ជីយ៉ុន (Jun Ji Hyun) កំពុងបោះជំហានលើវិស័យថ្មីមួយទៀត ដោយបានបង្កើតក្រុមហ៊ុនមួយដែលមានឈ្មោះថា PEACHY ជាស្លាកយីហោក្រុមហ៊ុនគ្រប់គ្រងអ្នកសិល្បៈ។
ជុន ជីយ៉ុន (Jun Ji Hyun) បានចែករំលែកហេតុផលមួយចំនួនដែលនាំឱ្យមានការបង្កើតក្រុមហ៊ុន PEACHY នេះឡើងមក យ៉ាងដូច្នេះថា ក្នុងនាមជាមនុស្សម្នាក់ដែលស្ថិតនៅក្នុងវិស័យសម្តែងនេះផ្ទាល់ នាងត្រូវការពេលវេលាដើម្បីឆ្លុះបញ្ចាំងពីខ្លួនឯង និងស្វែងរកទិសដៅថ្មី។ ដូចនេះវាគឺជាជម្រើសដែលអាចឆ្លុះបញ្ចាំងថានាងគឺជានរណានៅពេលនេះ ហើយវាគឺជាការចាប់ផ្តើមថ្មី ក្នុងការផ្តោតលើរឿងសំខាន់មួយបន្ថែមទៀតផងដែរ។
ជាមួយគ្នានេះអ្នកតំណាងឱ្យក្រុមហ៊ុនបានឱ្យដឹងដែរថា ការចាប់ផ្តើមការងាររបស់ពួកគេ គឺមើលថែសកម្មភាពរបស់តារាសម្ដែង ជុន ជីយ៉ុន (Jun Ji Hyun) ហើយនៅពេលអនាគត ពួកគេមានគម្រោងពង្រីកអាជីវកម្មផលិតមាតិកាផ្សេងៗបន្ថែមទៀត។
គួរឱ្យដឹងថា ជុន ជីយ៉ុន (Jun Ji Hyun) ទើបតែបានបញ្ចប់កិច្ចសន្យារបស់នាងជាមួយ អ៊ាម ហាសធែក (IEUM HASHTAG) នៅក្នុងខែមិថុនា កន្លងទៅនេះទេ ហើយនៅខែកញ្ញានេះនាងនឹងត្រៀមជួបជាមួយអ្នកគាំទ្ររបស់នាងសារជាថ្មីតាមរយៈរឿងភាគថ្មីមួយរបស់ Disney+ ដែលមានឈ្មោះថា ថេមភីសថ៍ (Tempest) ដែលសម្តែងរួមគ្នាជាមួយតារាសម្តែង កាង ដុងវ៉ុន (Gang Dong Won)៕
