តារាសម្តែងកូរ៉េ Kang Seo Ha ស្លាប់ក្នុងវ័យ ៣១ ឆ្នាំ ដោយជំងឺមហារីក

យោងតាមការចេញផ្សាយរបស់សារព័ត៌មានកូរ៉េបានឲ្យដឹងថា តារាសម្តែងដ៏មានទេពកោសល្យ ខាង ស៊ូហា (Kang Seo Ha) បានទទួលមរណភាពកាលពីព្រឹកមិញថ្ងៃទី ១៤ ខែកក្កដា ឆ្នាំ ២០២៥ ក្នុងអាយុត្រឹមតែ ៣១ឆ្នាំប៉ុណ្ណោះ បន្ទាប់ពីបានប្រយុទ្ធនឹងជំងឺមហារីកដ៏កាចសាហាវអស់រយៈពេលជាយូរ។

ខាង ស៊ូហា (Kang Seo-ha) កើតនៅឆ្នាំ ១៩៩៤ បានបញ្ចប់ការសិក្សាពីសាកលវិទ្យាល័យសិល្បៈជាតិកូរ៉េ ជំនាញផ្នែកល្ខោន។ តារាស្រីរូបនេះបានបង្ហាញខ្លួនជាលើកដំបូងនៅក្នុងវិស័យសិល្បៈក្នុងឆ្នាំ ២០១២ ដោយបង្ហាញខ្លួននៅក្នុងវីដេអូចម្រៀង ហ្កេធីង អឹវ៉េយ៍ (Getting Away) របស់ក្រុម ប្រេវ ហ្កឺល (Brave Girls) ។

បន្ទាប់ពីនោះ នាងក៏បានចាប់ផ្តើមសម្តែងក្នុងរឿងភាគទូរទស្សន៍ជាច្រើនដូចជា ស៊ូណាម ហ្កឺល ហាយ ស្កូល ឌិថេកធីវ ធីម (Sunam Girls' High School Detective Team) របស់ JTBC, អឹ សេមប្ល៊ី (Assembly) របស់ KBS និង អ៊ុកជុងវ៉ា (Okjunghwa) របស់ MBC ជាដើម។ ចំណែកឯរឿងថ្មីរបស់នាងដែលមានឈ្មោះថា ដឹ ម៉េនហ្កីន (The Mangin) ត្រូវបានគេរំពឹងថានឹងចេញផ្សាយបន្ទាប់ពីការស្លាប់របស់នាង។

ការស្លាប់របស់ ខាង ស៊ូហា (Kang Seo Ha) បានធ្វើឲ្យមិត្តរួមការងារ អ្នកគាំទ្រ មានការរន្ធត់ចិត្ត និងសោកស្ដាយជាខ្លាំង។ ដោយឡែកនៅម៉ោង ០៧.៤០ នាទីព្រឹក ថ្ងៃទី ១៦ ខែកក្កដា សពនឹងត្រូវបញ្ចុះស្ថិតនៅក្នុងទីក្រុង ហាម៉ាន់ (Haman) ខេត្ត គ្យូងសាង Gyeongsang៕