អ្នកគាំទ្រវិស័យបវរកញ្ញា នាំគ្នាសាទរ ក្រោយកញ្ញា “លីលៀ ជីសរ៉ារ្យ៉ាន់” (Lilia Gzraryan) បវរកញ្ញាអន្តរជាតិមកពីប្រទេស “អាមេនី” (Armenia) ដែលបានចូលរួមប្រកួតនៅក្នុងកម្មវិធី Miss Cosmo កាលពីឆ្នាំ ២០២៤ បានបង្ហោះរូបភាពជនភៀសសឹក ដែលជាប្រជាពលរដ្ឋខ្មែរ នៅក្នុង Story IG របស់ខ្លួន។ អ្វីដែលកាន់តែរំភើបជាងនេះទៅទៀតនោះ នៅលើរូបភាពដែលនាងបានចែករំលែក នៅក្នុងបណ្តាញសង្គម នាងបានអំពាវនាវឱ្យបងប្អូនខ្មែរទាំងអស់រួមគ្នាធ្វើការបរិច្ចាគ សម្ភារៈប្រើប្រាស់ផ្សេងៗដែលចាំបាច់ មិនថាតិចឬច្រើន តាមលទ្ធភាព ដើម្បីចែកជូនបងប្អូននៅតាមព្រំដែន។
អត្ថន័យទាំងមូលដែល បវរកញ្ញារូបនេះ បានភ្ជាប់មកជាមួយរូបភាពទាំងនោះមានខ្លឹមសារយ៉ាងដូច្នេះថា៖ “ប្រសិនបើអ្នកទាំងអស់គ្នាអាចធ្វើបាន សូមពិចារណាបរិច្ចាគសម្ភារពេទ្យសង្គ្រោះបឋម និងសម្ភារពេទ្យសង្គ្រោះបន្ទាន់ដូចជា បង់រុំ ថ្នាំសម្លាប់មេរោគ ថ្នាំបំបាត់ការឈឺចាប់ ឬសម្ភារផ្សេងៗដែលអាចជួយព្យាបាលរបួសបាន។ របស់ទាំងនេះ គឺត្រូវការជាចាំបាច់នៅពេលនេះ។ សម្រាប់អ្នកដែលចង់បរិច្ចាគអាហារ ភេសជ្ជៈ ឬសម្ភារនានា មិនថា តិចក្តី ឬ ច្រើនក្តី អាចធ្វើការបរិច្ចាគបានដើម្បីជួយដល់អ្នកដែលខ្វះខាតនៅតាមព្រំដែន។ អ្នកទាំងអស់គ្នា អាចនាំយករបស់បរិច្ចាគទាំងនោះ ទៅសួនច្បារវត្តបទុមនៅថ្ងៃស្អែកបាន (២៦ កក្កដា ២០២៥) ចាប់ពីម៉ោង ៨ ព្រឹក ដល់ ម៉ោង ១២ យប់”។
យ៉ាងណាមិញ ក្រោយបង្ហាញទឹកចិត្តដ៏ល្អប្រពៃ ស័ក្តិសមជាបវរកញ្ញាតំណាងប្រទេស កញ្ញា “លីលៀ ជីសរ៉ារ្យ៉ាន់” (Lilia Gzraryan) ដែលមកពីប្រទេស “អាមេនី” (Armenia) ត្រូវបានមហាជនលើកសរសើរចំពោះទឹកចិត្តដ៏ល្អបរិសុទ្ធ ចំពោះប្រជាជនខ្មែរក្នុងពេលមានអាសន្នបែបនេះ៕
