កាលពីរសៀលថ្ងៃទី ២១ ខែកក្កដា ឆ្នាំ ២០២៥ ក្រុមហ៊ុន អ៊ីនហ្វ្ល៊ូអឹនស៍ មីដៀ (Influence Media) បានរៀបចំកម្មវិធី សន្និសីទសារព័ត៌មាន ស្តីពី ការជ្រើសរើស បវរកញ្ញាឯកផែនដី មីស អឺស ឃែមបូដៀ (Miss Earth Cambodia) ២០២៥។
ថ្លែងក្នុងសន្និសីទសារព័ត៌មាន លោកស្រី ថីហ្វហ្វាន់នី វ៉ូ (Tiffany Vu) នាយិការគ្រប់គ្រងកម្មវិធី មីស អឺស ឃែមបូដៀ (Miss Earth Cambodia) ២០២៥ បានបង្ហាញអារម្មណ៍រំភើប ក្នុងនាមជានាយកថ្នាក់ជាតិ និង ជាការចាប់ផ្តើមនៃជំពូកថ្មីដ៏បំផុសគំនិត ក្នុងការលើកស្ទួយស្ត្រី ដើម្បីជួយឱ្យសំឡេងរបស់ពួកគេត្រូវបានឮ និងគាំទ្រពួកគេក្នុងការធ្វើឱ្យមានឥទ្ធិពលពិតប្រាកដ ទាំងក្នុងស្រុក និងពិភពលោក។
ដោយឡែក នៅទីបំផុត កញ្ញា សារ៉ាន់ គីមឡាង បានក្លាយជាបវរកញ្ញាឯកនៃ មីស អឺស ឃែមបូដៀ (Miss Earth Cambodia) ២០២៥ ដែលតំណាងអោយប្រទេសកម្ពុជាចូលរួមការប្រកួតប្រជែងឆាកអន្តរជាតិ មីស អឺស (Miss Earth) ២០២៥ នៅឯប្រទេស ហ្វីលីពីន ខណៈបេក្ខភាពបវរកញ្ញា២រូបទៀត គឺ កញ្ញា អាសូរ៉ា មូនីកា និង មាន សុវណ្ណរចនា ត្រឹមទទួលបានជ័យលាភីបវរកញ្ញាឯករង។
ជាមួយគ្នានេះ កញ្ញា សារ៉ាន់ គីមឡាង ដែលជាម្ចាស់ជ័យលាភីបវរកញ្ញាឯក បានបង្ហាញចំណាប់អារម្មណ៍ជាពិសេសចំពោះបញ្ហាបរិស្ថាននៅកម្ពុជា ដែលតែងតែបង្ហាញឱ្យឃើញតាមរយៈសំឡេង និងសកម្មភាពជាប្រចាំ ដើម្បីជួយជំរុញការផ្លាស់ប្តូរដល់សហគមន៍ និងសង្គម ជាពិសេសកញ្ញាបានត្រៀមខ្លួនរួចជាស្រេចក្នុងការតំណាងនាំយកឈ្មោះប្រទេសកម្ពុជាទៅកាន់ឆាក មីស អឺស (Miss Earth) អន្តរជាតិនាពេលឆាប់ៗខាងមុខនេះ។ បន្ថែមពីនេះកញ្ញាក៏បានតាំងចិត្តខ្ពស់ដើម្បីទៅប្រកួតបន្តនៅលើឆាកអន្តរជាតិ ដោយម្ចាស់ជ័យលាភីរូបនេះ ក៏គ្រោងលើកយកនូវប្រធានបទការការពារបរិស្ថាន និង ការទុកដាក់សំរាម ដើម្បីបញ្រ្ជាបការយល់ដឹងដល់យុវជន និងពលរដ្ឋបន្តថែរក្សាបរិស្ថានឱ្យបានស្អាតថែមទៀតផង។
គួរឱ្យដឹងថា កម្មវិធីប្រកួតសម្រស់ មីស អឺស (Miss Earth) គឺជាកម្មវិធីប្រកួតសម្រស់អន្តរជាតិដ៏ធំចំនួនបួន ចាប់តាំងពីឆ្នាំ 2001 ជាមួយនឹងកេរ្តិ៍ដំណែលដ៏មានមោទនភាពក្នុងការលើកកម្ពស់ការយល់ដឹងអំពីបរិស្ថាន និងការផ្តល់សិទ្ធិអំណាចដល់ស្ត្រីនៅទូទាំងពិភពលោក៕
