ភ្នំពេញ៖
បុរសម្នាក់ ត្រូវបានឃាតករមិនស្គាល់អត្តសញ្ញាណវាយសម្លាប់នៅក្នុងដីឡូតិ៍ មួយកន្លែងតំបន់អភិវឌ្ឍន៍ក្រុមហ៊ុមOCIC ដែលស្ថិតនៅក្នុងភូមិដើមគរ សង្កាត់ព្រែកតាសេកនខណ្ឌជ្រោយចង្វារ រាជធានីភ្នំពេញហើយបង្កឲ្យមានការភ្ញាក់ផ្អើលកាលពីវេលាម៉ោង០៥ និង៤០នាទី ថ្ងៃទី១០ ខែកក្កដា ឆ្នាំ២០២៥។
សពបុរសរូបនោះ ពុំស្គាល់អត្តសញ្ញាណឡើយ មានអាយុប្រមាណជាង៣០ឆ្នាំ ពាក់អាវដៃខ្លីពណ៌ស និង ពាក់អាវយឺតដៃខ្លីពណ៌ខ្មៅ ពីក្នុង ស្លៀកខោខូវប៊យជើងវែង ។នៅក្នុងហោប៉ៅខោមានទឹករំអិលចំនួន២កញ្ចប់, កូនសោរចំនួន៣កូន និងថ្នាំចំនួន២គ្រាប់ពណ៌ផ្កាឈូក និងពណ៌ស។
តាមព័ត៌មានបានអោយដឹងថានៅវេលាព្រឹកព្រលឹមស្រាងថ្ងៃទី១០ ខែកក្កដា ឆ្នាំ២០២៥ មានអ្នកដំណើរម្នាក់ បានជិះម៉ូតូតាមផ្លូវលំ ចូលទៅក្នុងបរិវេណតំបន់អភិវឌ្ឍន៍ អូស៊ីអាយស៊ី ក៏ប្រទះឃើញបុរសម្នាក់ដេកស្លាប់ផ្ងារនៅលើស្មៅជាប់គំរបលូ ដោយមានរបួសក្បាលរួចក៏រាយការណ៍ទៅសន្តិសុខក្រុមហ៊ុមOCIC ដែលជិះល្បាតនៅក្នុងតំបន់នោះនិងបន្តរាយការណ៍ទៅ សមត្ថកិច្ចបង្កឲ្យមានការភ្ញាក់ផ្អើលឡើង។
តាមព័ត៌មានឱ្យដឹងថានៅវេលាម៉ោងប្រមាណ ១១យប់ថ្ងៃទី០៩ ខែកក្កដាឆ្នាំ២០២៥ មានម៉ូតូជាច្រើនគ្រឿង បានជិះចូលទៅតំបន់នោះ។ ក្រោយមក គេបានឮសំឡេងម៉ូតូរោរិ៍ ខ្លាំងៗបើកចេញទៅ តែពុំមាននរណាម្នាក់ចាប់អារម្មណ៍ឡើយ។ លុះព្រឹកឡើងស្រាប់តែមានការភ្ញាក់ផ្អើល នៅពេលដែលអ្នកដំណើរឆ្លងកាត់ ក៏បានប្រទះឃើញសពបុរសរូបនោះដេកស្លាប់ឲ្យមានស្នាមរបួសក្បាល។
នៅកន្លែងកើតហេតុ គេឃើញមានដំបង មែកឈើ ដើមលឿងរាជមួយកំណាត់ប្រឡាក់ឈាម បែកសំបកខាងចុង ដែលគេសង្ស័យថាត្រូវបានឃាតករប្រើសម្រាប់វាយទៅលើ ករបស់ជនរងគ្រោះបណ្ដាឲ្យស្លាប់។ ទោះបីជាយ៉ាងណា គេ ពុំដឹងថាជនរងគ្រោះ មានទំនាស់អ្វីនោះទេ បានជាត្រូវឃាតករវាយសម្លាប់បែបនេះ។
តាមការពិនិត្យកន្លែងកើតហេតុនិងសាកសព យ៉ាងល្អិតល្អន់លោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញ បានធ្វើការសន្និដ្ឋានថាស្លាប់បុរសរូបនោះស្លាប់ដោយវាយក្បាលខាងក្រោយ (ករណីឃាតកម្ម វាយសម្លាប់)។
សពត្រូវបានសមត្ថកិច្ចបញ្ជូនទៅតម្កល់នៅឈាបនដ្ឋានវត្តស្ទឹងមានជ័យដើម្បីរង់ចាំបងប្អូន ៕
