កាលពីថ្ងៃទី ៤ ខែកក្កដា ឆ្នាំ ២០២៥ កន្លងទៅ ទីភ្នាក់ងារផលិតកម្មរបស់ បាង មីនអា (Bang Min-ah) សមាជិកក្រុម Girl’s Day និង អន ជូវ៉ាន (On Joo-wan) បានចេញសេចក្តីថ្លែងការណ៍រួមគ្នាមួយថា ពួកគេទាំងពីរនឹងមានគម្រោងរៀបការនៅក្នុងខែវិច្ឆិកានេះហើយ។
ទីភ្នាក់ងារផលិតកម្មរបស់ អន ជូវ៉ាន (On Joo-wan) ហេវ៉ាដល អេនថឹថេនម៉ឹនថ៍ (Haewadal Entertainment) បានឱ្យដឹងថា ក្រោយពេលពួកគេមើលចិត្តគ្នាអស់មួយរយៈកន្លងមក តារាសម្តែង អន ជូវ៉ាន (On Joo-wan) និង បាង មីនអា (Bang Min-ah) សម្រេចចិត្តប្រើជីវិតរួមគ្នា ដោយជីវិតគូរបស់ពួកគេនឹងចាប់ផ្តើមធ្វើឡើងនៅក្នុងខែវិច្ឆិកាខាងមុខនេះ។
ជាមួយគ្នានេះ ទីភ្នាក់ងារផលិតកម្មរបស់ បាង មីនអា (Bang Min-ah) អេសអេម ស៊ី អ៊ែន ស៊ី (SM C&C) ក៏បានចេញមកអះអាងដូចគ្នាដែរថា ពួកគេទាំងពីរបានស្គាល់គ្នាជាយូរមកហើយ និងមានទំនាក់ទំនងជាមួយគ្នាបន្តិចម្តងៗរហូតក្លាយជាស្នេហា។
ការរៀបចំពិធីរៀបការដែលនឹងធ្វើឡើងនៅក្នុងខែវិច្ឆិកានេះ នឹងធ្វើជាលក្ខណៈឯកជន ដោយមានតែសមាជិកគ្រួសារ និងមិត្តជិតស្និទ្ធប៉ុណ្ណោះ។
ផលិតទាំងពីរនេះក៏បានបញ្ជាក់បន្ថែមដែរថា ក្រោយពេលពួកគេរៀបការរួច ពួកគេនៅតែបន្តដំណើរលើវិថីសិល្បៈដដែល។
គួរឱ្យដឹងថា បាង មីនអា (Bang Min-ah) និង អន ជូវ៉ាន (On Joo-wan) ធ្លាប់សម្តែងរឿងរួមគ្នាជាលើកដំបូងនៅក្នុងរឿង ប៊្យូធីហ្វឺល ហ្កង ស្ហ៊ីម (Beautiful Gong Shim) កាលពីអំឡុងឆ្នាំ ២០១៦ និងបានសម្តែងរួមគ្នាម្តងទៀតនៅក្នុងរឿង ដឹ ដេយ៍ (The Days) កាលពីអំឡុងឆ្នាំ ២០២១ ដែលនេះគឺជាចំណុចចាប់ផ្តើមធ្វើឱ្យពួកគេមានចិត្តស្រឡាញ់លើគ្នា។
