សហព័ន្ធកីឡបាល់ទះកម្ពុជា បានប្រកាសពីសមាសភាពប្រតិភូគ្រូបង្វឹក កីឡាករ សរុបចំនួន ២០រូប ធ្វើដំណើរទៅកាន់ការប្រកួតលីគប្រចាំតំបន់អាស៊ាន Sea V League ដែលនឹងរៀបចំឡើងនៅប្រទេសហ្វីលីពីន ចាប់ពីថ្ងៃទី១០-១៣ ខែ កក្កដា និងឥណ្ឌូណេស៊ីនៅថ្ងៃទី ១៦-១៩ កក្កដា។ ក្រោយការប្រកាសសមាសភាពរួចមក ក្រុមប្រតិភូគ្រូបង្វឹក និងកីឡាករបាល់ទះជម្រើសជាតិកម្ពុជា ក៏បានធ្វើដំណើរចាកចេញពីទឹកដីកំណើត ទៅកាន់ការប្រកួត Sea V League។ នៅមុនការប្រកួតលីគដ៏ធំប្រចាំតំបន់ចូលមក លោក អាំង សិរីពិសិដ្ឋ អនុប្រធាន VFC ក៏បានលើកឡើងពីផលប្រយោជន៍នៃការចូលរួមរបស់កម្ពុជា ទៅក្នុងការប្រកួត Sea V League ថានឹងជួយអូសទាញកម្រិតចំណាត់ថ្នាក់ពិភពលោកកីឡាបាល់ទះកម្ពុជា ឱ្យកើនឡើងខ្លាំង។ ភាគច្រើនក្រុមដែលមានវត្តមានក្នុងការប្រកួត សុទ្ធសឹងតែមានចំណាត់ថ្នាក់ពិភពលោកខ្ពស់ជាងកម្ពុជា ហើយដែលកម្ពុជា ពុំធ្លាប់ចូលរួមការប្រកួត ស្ថិតនៅចំណាត់ថ្នាក់លេខរៀង ១៣៦ ហើយការប្រកួតនេះ ត្រូវបានរាប់ពិន្ទុចូលទៅកម្រិតចំណាត់ថ្នាក់ពិភពលោក។ ដំបូងឡើយ Sea V League តម្រូវឱ្យមានក្រុមចូលរួមការប្រកួតត្រឹមតែ ៤ក្រុម ប៉ុណ្ណោះ រួមមាន ឥណ្ដូណេស៊ី ថៃ និង ហ្វីលីពីន ហើយ កម្ពុជា ទទួលបានកៅអី Sea V League ក្រោយយកឈ្នះការប្រកួតព្រឹត្តិការណ៍ Sea V League Challenge ដែលរៀបចំនៅក្នុងប្រទេសកម្ពុជាកាលពីឆ្នាំ ២០២៤ កន្លងមក។ ប៉ុន្តែវត្តមានរបស់ វៀតណាម នៅតែមានទៅក្នុងការប្រកួត រឿងនេះ ជារឿងអយុត្តិធម៌មួយសម្រាប់កម្ពុជា ព្រោះតែវៀតណាម ជាប្រទេសធ្លាប់រៀបចំការប្រកួតអន្តរជាតិកម្រិតតំបន់ ដែលធ្វើឱ្យសហព័ន្ធបាល់ទះអាស៊ាន និងអាស៊ី ផ្តល់កៅអីស្វ័យប្រវត្តិចូលការប្រកួត Sea V League។
ត្រង់ចំណុចនេះ លោកបណ្ឌិត អាំង សិរីពិសិដ្ឋ បានលើកឡើងថា ក្រុមកម្ពុជា ពុំបានខ្វាយខ្វល់ពីការសម្រេចចិត្តបញ្ចូលវៀតណាមក្នុងការប្រកួតវិញ ពីសំណាក់អ្នករៀបចំការប្រកួតឡើយ ប៉ុន្តែអនុប្រធាន VFC សម្លឹងឃើញឱកាសសម្រួចសមត្ថភាពរបស់ក្រុមជម្រើសជាតិកម្ពុជា។ កន្លងមក បន្ទាប់ពីកម្ពុជា ឈ្នះកៅអី Sea V League ដែលត្រៀមបង្ហាញខ្លួនក្នុងការប្រកួតលើកដំបូង អនុប្រធាន VFC ក៏បានចាត់ទុកការចូលរួមប្រកួតប្រជែងក្នុង Sea V League ជាមួយនឹងក្រុមកម្រិតកំពូលទាំង ៤ ប្រចាំអាស៊ាន ជាការត្រៀមខ្លួនដ៏ខ្លាំងក្លាមួយ នឹងការដកស្រង់បច្ចេកទេស មុនការប្រកួតព្រឹត្តិការណ៍កីឡាស៊ីហ្គេមលើកទី៣៣ នៅប្រទេសថៃ។ដោយឡែក កម្ពុជា នឹងត្រូវតទល់វៀតណាម នៅថ្ងៃទី១០ កក្កដា មុនទៅប៉ះ ឥណ្ឌូណេស៊ី នៅមួយថ្ងៃបន្ទាប់។ កម្ពុជា បន្តជួបម្ចាស់ផ្ទះហ្វីលីពីន ថ្ងៃទី១២ និងចុងក្រោយ ប៉ះថៃ នៅថ្ងៃទី១៣ កក្កដា ដែលជាការប្រកួតជើងទីមួយនៃ Sea V League។ នៅការប្រកួតជើងទីពីរ កម្ពុជា ផ្តើមការប្រកួតប៉ះវៀតណាម នៅថ្ងៃទី១៦ មុន ប៉ះថៃ ថ្ងៃទី១៧, ហ្វីលីពីន ថ្ងៃទី១៨ និងចុងក្រោយ ជួបឥណ្ឌូណេស៊ី នៅថ្ងៃទី១៩ កក្កដា៕
