ភ្នំពេញ៖
បុរសម្នាក់សង្ស័យស្រវឹងស្រាខ្លាំង បានបើករថយន្តម៉ាក Toyota Prius មួយគ្រឿងបោះពួយយ៉ាងលឿន ក៏រ៉េចង្កូតទៅបុករះម៉ូតូចំនួន ២គ្រឿង បណ្ដាលឲ្យបុរសម្នាក់ស្លាប់ ពេលបញ្ជូនដល់មន្ទីរពេទ្យ ចំណែកឯបុរសម្នាក់ទៀតគ្រាន់តែរងរបួសស្រាល។
ហេតុការណ៍ខាងលើនេះដែរ បង្កឲ្យមានការភ្ញាក់ផ្អើលកាលពីវេលាម៉ោង 11:30នាទីយប់ថ្ងៃទី06 ខែកក្កដាឆ្នាំ 2025 ស្ថិតនៅតាមបណ្ដោយផ្លូវ 105k ក្នុងសង្កាត់ក្រាំងធ្នង់ ខណ្ឌសែនសុខរាជធានីភ្នំពេញ។
បើតាមការបញ្ជាក់ពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តបង្កម៉ាក Toyota Prius មួយគ្រឿងពាក់ស្លាកលេខ ភ្នំពេញ 2BO-3925 បើកបរដោយបុរសម្នាក់ធ្វើដំណើរតាមបណ្តោយផ្លូវ១០៥ K ទិសដៅពីជើងមកត្បូងក្នុងល្បឿនលឿនទាំងស្ថានភាពស្រវឹង។ លុះពេលបើកមកដល់ចំណុចកើតហេតុ ក៏រេចង្កូតទៅបុករះម៉ូតូ២គ្រឿង មួយគ្រឿងម៉ាកហុងដាស្គុបពី ពណ៌ខ្មៅ ពាក់ស្លាកលេខ ភ្នំពេញ 1JS-6468 ជិះដោយបុរសម្នាក់។
ចំណែក១គ្រឿងទៀតម៉ាកហុងដា PCX ពណ៌ខ្មៅ ពាក់ស្លាកលេខភ្នំពេញ 1LA-7738 ជិះដោយបុរសម្នាក់ ធ្វើដំណើរស្របគ្នាតាមបណ្ដោយផ្លូវ 105k ទិសដៅពីត្បូងទៅជើង ចំពីមុខពេញទំហឹងបណ្ដាលបុរសម្នាក់ជាម្ចាស់ ម៉ូតូ PCX បានស្លាប់ពេលបញ្ជូនដល់មន្ទីរពេទ្យ។ ចំណែកឯបុរសម្នាក់ទៀត បានរងរបួសស្រាលហើយភ្លាមនោះដែរអ្នកបើករថយន្តបង្ករត្រូវសមត្ថកិច្ចឃាត់យកទៅសួរនាំ។
ក្រោយកើតហេតុខាងលើ សមត្ថកិច្ចមូលដ្ឋានសហការជាមួយជំនាញចរាចរណ៍ចុះមកវាស់វែងយកម៉ូតូពីរគ្រឿងនិងរថយន្តមួយគ្រឿងទៅរក្សាទុកជាបណ្ដោះអាសន្ន រង់ចាំការដោះស្រាយគ្នានៅពេលក្រោយ ចំណែកសពសមត្ថកិច្ចធ្វើកំណត់ហេតុប្រគល់ឲ្យទៅគ្រួសារយកទៅធ្វើវិលទៅប្រពៃណី៕
