ភ្នំពេញ៖
បុរសម្នាក់បើករថយន្ត ម៉ាកToyota Prius មួយគ្រឿងក្នុងល្បឿនលឿនមិនប្រយ័ត្ន ក៏រេចង្កូតជ្រុលទៅបុករបាំងថ្មពុះចែកផ្លូវ បាក់មួយកង់ប៉ើងខ្ទាតទៅបិតផ្លូវម្ខាងទៀត ស្របពេលមានរថយន្តToyota Prius មួយគ្រឿងបើកបញ្រ្ចាសទិសមកបុកបន្ថែមបណ្តាលឲ្យរងការខូចខាតយ៉ាងធ្ងន់ធ្ងរទាំងសងខាង។
ហេតុការណ៍គ្រោះថ្នាក់ខាងលើនេះដែរស្ថិតនៅតាមបណ្ដោយផ្លូវ សហព័ន្ធរុស្ស៊ី សង្កាត់ ស្រះចក ខណ្ឌ ដូនពេញ រាជធានី ភ្នំពេញ វេលា ម៉ោង ១:២០នាទីរំលងអាធ្រាត្រ ឈានចូល ថ្ងៃទី២៣ ខែកក្កដា ឆ្នាំ ២០២៥។
បើតាមការបញ្ជាក់ពីកន្លែងកើតហេតុ បានឲ្យដឹងថានៅមុនពេលកើតហេតុ គេឃើញរថយន្តម៉ាក Toyota Prius ពណ៌កណ្តុប្រមេះមួយគ្រឿងពាក់ផ្លាកលេខភ្នំពេញ 2S-4686 បើកបរដោយបុរសម្នាក់ធ្វើដំណើតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីកើតទៅលិចក្នុងល្បឿនលឿន។ លុះពេលបើកមកដល់ចំណុចកើតហេតុ ស្រាប់តែជ្រុលចង្កូតទៅ បុករបាំងថ្មពុះចែកទ្រូងផ្លូវ បាក់១កង់ខ្ទាត ចេញពីគន្លងដើម ទៅបិតផ្លូវម្ខាងទៀត ស្របពេលដែលមានរថយន្តមួយគ្រឿងទៀតម៉ាក Toyota Prius ពណ៌ស ពាក់ផ្លាកលេខភ្នំពេញ 2BR-6885 ធ្វើដំណើរក្នុងទិសដៅពីលិចទៅកើត ក្នុងល្បឿនលឿនជាន់ហ្រ្វាំងមិនទាន់ ក៏ជ្រុលទៅបុករបាំងថ្មពុះចែកទ្រូងផ្លូវ ដែលខ្ទាតចេញពីគន្លងដើមបន្ថែម បណ្ដាលឲ្យរងការខូចខាតយ៉ាងធ្ងន់ធ្ងរសំណាងល្អមិនបង្កឲ្យមានគ្រោះថ្នាក់ដល់មនុស្ស។
ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ធ្វើការវាស់វែងយករថយន្តទៅរក្សាទុកដើម្បីរងចាំដោះស្រាយនៅពេលក្រោយ៕
