អ្នកគាំទ្ររំភើប ក្រោយ “យូរី” (Yuri) តារាចម្រៀងស្រីដ៏ល្បីរបស់ក្រុម “ហ្កឺល ជេណឺរ៉េយស្ហឹន” (Girls' Generation) បានភ្ជួរក្បាលមេក្រូជាបណ្ដោះអាសន្ន បើកថ្នាក់បង្ហាត់យូហ្គា បែបសប្បុរសធម៌ជាលើកដំបូង កាលពីថ្ងៃទី ២៦ ខែកក្កដា ឆ្នាំ ២០២៥  ដើម្បីរៃអង្គាសថវិកាសម្រាប់ជួយសង្គ្រោះសត្វសុនខអនាថាជាពិសេស។

នៅក្នុងយុទ្ធនាការនេះ “យូរី” (Yuri) បានដឹកនាំថ្នាក់យូហ្គាដោយផ្ទាល់ ដែលមានរយៈពេលពីរម៉ោង ចាប់ពីម៉ោង ២ រសៀល ដល់ម៉ោង ៤ ល្ងាច នៅក្នុងទីក្រុង ចេជូ (Jeju) ដោយតម្លៃចូលរួមត្រឹមតែ ៥ ម៉ឺនវ៉ុន សម្រាប់មនុស្សម្នាក់។

យ៉ាងណាមិញ ព្រឹត្តិការណ៍នេះគឺ មានការចូលរួមលើសពីការរំពឹងទុក ពោលគឺអាចរៃអង្គាសថវិកាពីអ្នកចូលរួមបានរហូតដល់ទៅ ១.៨៥ លានវ៉ុនឯណោះ ហើយថវិកាដែលទទួលបាន នឹងត្រូវបានបរិច្ចាគសម្រាប់ការមើលថែសត្វសុនខអនាថាទាំងអស់ ដោយមិនមានការកាត់ភាគរយប្រាក់ដែលទទួលបាននោះឡើយ។

តំណាងអ្នករៀបចំព្រឹត្តិការណ៍បានបង្ហាញអារម្មណ៍សប្បាយរីករាយ និងបានអរគុណអ្នកដែលបានចូលរួមទាំងអស់សម្រាប់ថ្នាក់យូហ្គានេះ រួមទាំងអ្នកដែលបានផ្ញើសារគាំទ្រ និងអ្នកដែលបានជួយរៀបចំព្រឹត្តិការណ៍នេះជាដើម។ អ្នកតំណាងនេះ សង្ឃឹមថា ព្រឹត្តិការណ៍នេះនឹងក្លាយទៅជាការចងចាំដ៏អស្ចារ្យមួយ។ ដោយឡែកទឹកប្រាក់ដែលទទួលបានពីសប្បុរសជន នឹងត្រូវយកទៅចាត់ចែងដើម្បីឱ្យកើតជាប្រយោជន៍ខ្លាំងបំផុតដល់ជីវិតសត្វដែលត្រូវការការជួយសង្គ្រោះ។

គួរឱ្យដឹងថា បន្ទាប់ពីព្រឹត្តិការណ៍នេះ តារាចម្រៀង “យូរី” (Yuri) ទទួលបានការសាទរពីបណ្តាញផ្សព្វផ្សាយ និងអ្នកគាំទ្រជាច្រើន ដែលមិនត្រឹមតែនាងបានចុះទៅដឹកនាំផ្ទាល់ដោយខ្លួនឯងនោះទេ ប៉ុន្តែនាងថែមទាំងបានប្រើកេរ្តិ៍ឈ្មោះក្នុងផ្លូវល្អមួយ ដើម្បីគាំទ្រ និងលើកកម្ពស់សុខុមាលភាពរបស់សត្វសុនខដែលកំពុងខ្វះភាពកក់ក្តៅផងដែរ៕