ប៉ីប៉ី ឌី តបបែបនេះ ក្រោយមានអ្នករិះគន់ ម៉ែសេះ ដើរជាតួឯកក្នុងរឿង “ភូមិគ្រឹះអាគម”

ដូចដែលមហាជនបានជ្រាបស្រាប់ហើយថា កាលពីប៉ុន្មានថ្ងៃមុននេះ ផលិតកម្ម Film Corner ដែលមានលោក ប៉ីប៉ី ឌី ជាម្ចាស់ផលិតកម្ម បានធ្វើការបញ្ចេញ Trailer រឿងដុំខ្នាតធំទីមួយរបស់ខ្លួនដែលមានចំណងជើងថា “ភូមិគ្រឹះអាគម” នៅតាមបណ្តាញសង្គម ទទួលបានការគាំទ្រយ៉ាងខ្លាំងពីមហាជន។

ទន្ទឹមនឹងនេះ ក៏មានមហាជនមួយចំនួនតូចបានបង្ហាញការមិនពេញចិត្តផងដែរ ដោយអ្នកខ្លះបានលើកឡើងថា ស្រុកខ្មែរប្រហែលជាខ្វះតួ បានជាយកម៉ែសេះ មកដើរជាតួឯកទៅវិញ។

តបទៅនឹងមតិរិះគន់ទាំងនោះ លោក ប៉ីប៉ី ឌី ដែលជាម្ចាស់ផលិតកម្មបានឱ្យដឹងនៅលើទំព័រហ្វេសប៊ុកផ្លូវការរបស់ខ្លួនថា មិនបានខ្វះតួដូចដែលការលើកឡើងនោះទេ ប៉ុន្តែការដែលយកម៉ែសេះ ដែលជាកូនក្រុមរបស់ខ្លួនមកសម្តែងជាតួឯកស្រីនេះ ក៏ដោយសារលោកចង់លើកម៉ែសេះ ធ្វើជាតួឯកស្រីនៅក្នុងរឿងកុនដំបូងរបស់ខ្លួនតែម្តង។ លោក ប៉ីប៉ី ឌី ក៏បានគូសវាសដែរថា ចង់ឱ្យមហាជនអ្នករិះគន់ បើកចិត្តឱ្យទូលាយ និងទទួលយកមនុស្សដែលមានសមត្ថភាព ដូចជាម៉ែសេះជាដើម។

គួរឱ្យដឹងថា រឿង “ភូមិគ្រឹះអាគម” ដែលជាភាពយន្តខ្នាតធំដំបូងរបស់ផលិតកម្ម Film Corner នឹងត្រៀមចាក់បញ្ចាំងនៅតាមរោងភាពយន្តក្នុងស្រុកមួយចំនួន ចាប់ពីថ្ងៃទី ២៨ ខែសីហា ឆ្នាំ ២០២៥ នេះតទៅ៕